A Fegamp ve o futuro do servizo de axuda a domicilio en risco se non se aclara como financialo

O delegado do Goberno reivindica as axudas estatais aos municipios galegos.

Por Europa Press / Redacción | SANTIAGO DE COMPOSTELA | 09/01/2023 | Actualizada ás 16:26

Comparte esta noticia

O presidente da Federación Galega de Municipios e Provincias (Fegamp), o socialista Alberto Varela, reiterou a súa petición á Xunta de que sente a negociar o financiamento dos concellos, especialmente as contías do fondo de cooperación local. Así mesmo, denunciou que este organismo está a asumir "competencias impropias", que pertencen a outras administracións, "principalmente" a autonómica.

"Se se avanza no pacto local vai supor un gran alivio para as arcas municipais" que contan con "un déficit duns 600 millóns", explicou tras unha reunión mantida este luns co delegado do Goberno en Galicia, Jose Miñones, para tratar os investimentos do Estado nos concellos galegos en 2023.

Varela fixo fincapé, ademais, nun tema que "está a preocupar moito a todos os concellos, sen excepción" que é a axuda a domicilio. "Temos moito medo polo futuro deste servizo, se non aclaramos como se vai seguir financiando e se non vemos un compromiso claro de todas as administracións", aclarou.

Neste senso, o presidente da federación municipalista cualificou de "fundamental" para os municipios o aumento "dun 15 %" na participación dos ingresos do Estado durante os últimos dous anos con "fondos incondicionados".

En canto á Xunta, denunciou que o investimento non se incrementou. "Non foi posible, non aumentou, seguimos recibindo o mesmo, non tivo en conta as necesidades dos concellos galegos", criticou.

Varela agradeceu a "conexión constante" entre o representante en Galicia do Goberno do Estado e os concellos e asegurou que as entidades locais "sempre van estar á altura e aproveitar calquera oportunidade".

ACHEGA ESTATAL

O delegado do Goberno, pola súa banda, sinalou que "por primeira vez o Goberno de España chega aos 313 concellos de Galicia" con liñas de actuación concretas. "Dos 2.900 beneficiarios que tiveron ata agora as convocatorias de axudas, practicamente un terzo son para entidades locais", puntualizou.

Miñones destacou tamén "unha cifra marca" de transferencias directas do Executivo central á Xunta cun importe de case "9.400 millóns de euros", así como no caso dos concellos con 22.335 millóns de euros.

O "compromiso" do Goberno co municipalismo, segundo concretou, queda reflectido nos "investimentos, programas e servizos" ofertados e incidiu en que os "obxectivos" marcados desde o Executivo son "protexer aos municipios galegos e avanzar na modernización destes concellos" con "planificación e financiamento".

O delegado do Goberno en Galicia, José Miñones, reúnese co presidente da Fegamp, Alberto Varela
O delegado do Goberno en Galicia, José Miñones, reúnese co presidente da Fegamp, Alberto Varela | Fonte: DELEGACIÓN DO GOBERNO EN GALICIA

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta