A vítima do tiroteo de Maceda apunta ao investigado como o autor dos feitos
Os motivos sinalan unha débeda de 2.000 euros.
Por Europa Press / Redacción | OURENSE | 11/01/2023 | Actualizada ás 20:12
A vítima do tiroteo ocorrido en Maceda o pasado mes de novembro declarou este mércores ante o maxistrado de Instrución número 1 de Ourense, fronte ao que sinalou ao investigado como o autor dos feitos e apuntou como motivo o pago dunha débeda que ascendía a 2.000 euros.
O suceso remóntase á noite do 2 de novembro, cando o presunto agresor, segundo relatou a vítima na súa declaración xudicial, presentouse no seu domicilio porque acordaran a entrega dun pago que lle debía.
A cifra ascendía, segundo a súa versión, a 2.000 euros, unha cantidade que lle debía desde había varios meses polas reparacións que tivo que realizar a dous coches que lle comprou coa intención de revender, pero que presentaban danos.
Así pois, con esa intención presentouse na súa vivenda, onde estiveron a falar. Nun momento determinado, dixo, o agresor díxolle que ía ao coche buscar o diñeiro, pero sacou unha arma e disparou seis veces, sendo alcanzado por tres dos proxectís.
A consecuencia dos tres impactos --que recibiu na cara, no abdome e nunha perna--, permaneceu entubado no hospital 22 días. Xa alí declarou ante a Garda Civil e agora está personado como acusación particular.
As dilixencias abríronse por un posible roubo con violencia ou pola posibilidade dunha tentativa de homicidio ou asasinato. Para o letrado da acusación particular, Eduardo Sánchez, non se trata dun roubo, posto que apunta que "non faltou nada na vivenda", aínda que será a instrución quen determine a cualificación.
Hoxe tamén compareceu no xulgado a muller do presunto agresor, pero acolleuse ao seu dereito a non declarar.
