As municipais son "unha oportunidade" para "ampliar e asentar" o proxecto nacionalista, asegura Pontón

A portavoz nacional do BNG, Ana Pontón, reivindicou este sábado os próximos comicios municipais como "unha oportunidade" para "ampliar e asentar" o proxecto nacionalista.

"Para conseguilo é necesario facer os deberes e facelos ben, con previsión e con organización, con xenerosidade e con amplitude de miras. As municipais son unha magnífica oportunidade para agrandar a base social do BNG, incrementar a nosa presenza no territorio, integrar persoas e colectivos para seguir construíndo, con intelixencia e con humildade, a gran casa común do amor a Galicia e da defensa dos seus intereses que é o BNG", argumentou Pontón.

Nunha xornada con representantes municipais sobre propostas en relación ao cambio climático e á xestión de residuos, a portavoz do Bloque puxo en valor que as eleccións de maio son as primeiras dun ciclo electoral "de longo percorrido", polo que a formación nacionalista debe traballar para "agrandar" a súa base social e electoral.

Para Pontón, o BNG "sabe gobernar" e desde os concellos demostra "a eficacia, a solvencia e a capacidade para mellorar a vida das persoas". "Ese é o mellor aval co que podemos presentarnos ante a cidadanía nas eleccións municipais", defendeu.

Por iso, sostivo que o próximo 28 de maio sairán "a por todas" e "sen porse límites" porque, proclamou, serán a forza política "que máis suba" e que aumentará "máis alcaldías, máis concelleiras e máis concelleiras".

Doutra banda, Ana Pontón tamén fixo referencia á situación actual dos prezos e, neste sentido, criticou que a Xunta sexa "insensible aos problemas da xente do común" e estea "instalada na rutina, sen proxecto e sen impulso político, incapaz de tomar nin unha soa medida relevante para sacar Galicia adiante".

Deste xeito, comprometeu que o Bloque "seguirá presentando alternativas viables" para unha saída "galega e xusta á crise", con medidas como a recuperación do cartón básico, a tarifa eléctrica galega ou propostas para facerlle fronte ao incremento de prezos do aluguer e das hipotecas.

"Somos conscientes das dificultades e dos grandes desafíos, pero nunca como agora tivemos tan claro que o noso país necesita un cambio de rumbo. Desde o BNG imos seguir traballando con rigor, con coherencia, con humildade, sabendo que somos a esperanza de moitos galegos para construír esoutra Galicia posible, concello a concello", insistiu.

DOUS MODELOS DE XESTIÓN DE RESIDUOS

Por outra banda, nesta xornada de traballo, celebrada en Ames, e á que acudiron un centenar de cargos municipais do seu partido, Pontón defendeu que o BNG ten unha proposta alternativa de goberno que se observa nunha cuestión como a xestión dos residuos e a loita contra o cambio climático.

Neste sentido, reivindicou o modelo de compostaxe individual e colectivo que permite reciclar "unha parte cada vez maior dos residuos orgánicos". Un modelo que, asegurou, está "nas antípodas do que executa o PP desde a Xunta da man de Sogama".

"Nos últimos doce anos, o único que fixo o Executivo do PP e Sogama foi incumprir o seu propio plan de residuos e a práctica totalidade da normativa en vigor. Resultado: non se avanzou na separación, non se avanzou na compostaxe e, por encima, obstaculizan as iniciativas que executan os concellos do BNG que traballan nun modelo alternativo e de futuro", criticou.

Así, insistiu en que o modelo do BNG ten como base "minimizar, separar e reciclar" e puxo como exemplo o posto en marcha en 2015 polos nacionalistas na Deputación de Pontevedra baixo o nome de 'Plan Revitaliza'.

A esta iniciativa, continuou, adheríronse "47 concellos dos 61 que ten a provincia", que contan con "unha eficacia no tratamento de residuos única no Estado". "O nivel medio de separación de residuos é do 30%, case tres veces máis que a media galega do 11%", explicou.

A portavoz nacional do BNG, Ana Pontón, nun acto da formación nacionalista.. BNG | Fonte: Europa Press