A Xunta, "preocupada" polo estado das estradas estatais como a A-6 ante os efectos do temporal
Sinalou que continúa "vixiante" ante posibles afectacións do temporal que azouta a Comunidade
Por Europa Press / Redacción | SANTIAGO DE COMPOSTELA | 18/01/2023 | Actualizada ás 12:16
A conselleira de Infraestruturas e Mobilidade, Ethel Vázquez, sinalou que a Xunta de Galicia continúa "vixiante" ante posibles afectacións do temporal que azouta a Comunidade nas estradas de titularidade autonómica, para cuxa seguridade "continúa activo o Plan de Viabilidade Invernal". Con todo, a conselleira mostrouse preocupada pola situación das estradas de titularidade estatal, como a A-6, xa afectada o colapso do viaduto de O Castro, en Lugo.
"Seguimos con atención e preocupación o estado das estradas de competencia do Goberno estatal, como a A-6, que xa é preocupante polo colapso dos viadutos. O prognóstico da Xunta está a cumprirse. Advertimos xa no verán que non ter unha vía alternativa ía complicar a circulación no inverno e estámolo vendo, coa A-6 pechada e a alternativa por nacional con moitos problemas", sinalou Vázquez, que lembrou ademais que se trata da "vía principal de acceso a Galicia" e que afecta, non só á circulación normal, senón tamén ao transporte de mercadorías".
Respecto da situación das estradas de titularidade autonómica, a responsable de Infraestruturas remarcou que continúa activo o Plan de Viabilidade Invernal, "con case 400 profesionais e 26 centros operativos para resolver as incidencias nas estradas".
Lembrou tamén que algunhas estradas na montaña de Ourense seguen pechadas, mentres que noutras é necesario circular con cadeas. Ademais, recoméndase circular con precaución nalgunhas vías de Lugo e pola AG-53.
Doutra banda, no acto de firma este mércores dun convenio de colaboración entre a Xunta, a Federación Galega de Construción e o Instituto Tecnolóxico de Galicia, a conselleira reiterou a "disposición" do departamento autonómico a pór en marcha o parking para o Hospital Clínico de Santiago de Compostela, pero matizou que é necesario un estudo de mobilidade e a posta a disposición de terreos por parte do Concello.
