Nova liña de axudas da Xunta para entidades sociais que desenvolvan programas para mulleres en vulnerabilidade

A Xunta de Galicia convocou novas liñas de axudas de ata 40.000 euros para entidades de iniciativa social que desenvolvan programas de apoio a mulleres en situación de vulnerabilidade.

Este xoves o Diario Oficial de Galicia (DOG) publicou unha nova convocatoria por valor de 1,4 millóns de euros coa que a Consellería de Promoción do Emprego e Igualdade porá en marcha novos programas a través de entidades sociais sen ánimo de lucro.

O obxectivo do Goberno autonómico, segundo avanzou nun comunicado, é que as mulleres con maiores dificultades poidan recibir un seguimento e mellorar as súas opcións de emprego e expectativas sociais e persoais.

Por tanto, as actuacións terán que considerar o diferencial feminino e o fomento da igualdade de oportunidades como punto básico da atención especializada.

Así, o requisito para poder recibir este financiamento é que as entidades promovan recursos integrais dirixidos especificamente a mulleres en situación de especial vulnerabilidade gestantes ou lactantes, con fillos ou fillas menores de tres anos.

Desta maneira, entre os casos que abarcaría a liña de axudas estarían as vítimas de violencia de xénero, de explotación sexual-laboral, inmigrantes, emigrantes retornadas ou refuxiadas, pertencentes a unha minoría ou reclusas, entre outras.

Tamén apoiarán programas de atención personalizada e especializada para mulleres pertencentes a colectivos vulnerables desde o eixo da atención psicolóxica, asesoramento xurídico, mediación, adquisición dehabilidades persoais e sociais ou apoio e orientación laboral.

A cantidade máxima que poderá recibir cada entidade será 40.000 euros e o período límite para desenvolver os programas e imputar os gastos financeiros será o 31 de agosto deste ano.

Teléfono de asistencia 016 para atender situacións de violencia de xénero