Por Europa Press / Redacción | SANTIAGO DE COMPOSTELA | 21/01/2023 | Actualizada ás 13:34
O BNG acusou ao Partido Popular de facer un "uso partidista" da Lei do Litoral para así confrontar co Goberno central a través dunha cuestión que consideran "esencial" e que, para os nacionalistas, require que a comunidade exerza "todas" as súas competencias en relación ao dominio público marítimo e terrestre, algo que, como lembran, está amparado polo Estatuto de Autonomía.
A formación frontista levará esta cuestión ao debate parlamentario a través dunha proposición non de lei coa que pretenden demandar o apoio da Cámara autonómica para instar á Xunta a que "defenda" o exercicio de "todas" as súas competencias na ordenación do litoral.
Nun comunicado, os deputados nacionalistas Luís Bará e Rosana Pérez afearon a postura adoptada polo PP desde o Goberno galego co impulso dunha normativa que consideran "papel mollado" sempre que non vaia acompañada dunha transferencia dos medios de xestión do dominio público marítimo e terrestre.
Así, ven a Xunta e Goberno "enrocadas en posicións partidistas", polo que demandan a "apertura dun prazo" de tres meses para que poidan participar na redacción da nova lei "todas as administracións, entidades sociais e os sectores económicos".
En palabras da responsable de Pesca no Grupo Parlamentario do Bloque, Rosana Pérez, o exercicio de competencias propias na xestión do litoral é para Galicia "unha necesidade imperiosa" que require dun "amplo proceso de debate social e institucional".
Para Rosana Pérez, a Xunta está "máis interesada en alimentar o enfrontamento institucional que en defender os intereses do mar e a costa galega" mentres se atopa "sumida nunha campaña para defender algo tan insustentable como a permanencia de Ence na ría de Pontevedra" a través deste proxecto de lei.
Por último, pediu "maior concreción" nalgunhas propostas contidas na normativa, xa que advirten que se lle outorga un papel "preponderante" á actividade turística por encima da pesqueira.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.