Comesaña afirma que a ampliación dos horarios dos puntos de vacinación se debe á situación da Covid en China
Con todo, quixo reiterar unha mensaxe de tranquilidade á poboación.
Por Europa Press / Redacción | SANTIAGO DE COMPOSTELA | 21/01/2023 | Actualizada ás 18:43
O conselleiro de Sanidade, Julio García Comesaña, manifestou que a ampliación dos horarios dos puntos de vacinación contra o covid está ligado á situación da pandemia en China, aínda que quixo reiterar unha mensaxe de tranquilidade á poboación.
"É respecto; nin preocupación, nin alarma", remarcou en declaracións aos medios en Mos (Pontevedra) o titular de Sanidade este sábado, xornada na que comezou a ampliación dos horarios dos centros sanitarios nos que se administra a vacina contra o covid-19 co obxectivo de que aqueles con doses pendentes acudan a completar as pautas.
Tras agradecer o comportamento dos galegos e dos profesionais sanitarios desde o inicio do proeso de vacinación, o conselleiro incidiu en que a extensión dos horarios busca "ofrecer a oportunidade" de que acudan aos seus centros de saúde a facelo, para o que a Xunta convida a empregar o sistema de autocita.
Ademais da vacinación, tarefa na que Comesaña defendeu a elección dos centros de saúde en lugar dos hospitais unha vez pechados os vacunódromos, o membro do Executivo autonómico subliñou a importancia da secuenciación de casos, o que permitiu esta semana coñecer os primeiros casos identificados en Galicia da variante XBB.1.5, coñecida kraken.
Trátase de catro positivos --dous na área de Pontevedra e outros dous na da Coruña-- en pacientes que se atopan nas súas casas, segundo confirmou o conselleiro, quen apelou á tranquilidade ante a evidencia de que se trata dunha variante cun comportamento similiar á ómicron, dominante desde hai un ano.
"Esta variante (a kraken) parece que mantén as características de ómicron de ser contaxiosa pero non producir unha enfermidade grave", apuntou García Comesaña, quen concluíu con que a pandemia cambiou "fóra" do ámbito sanitario, pero que dentro del, séguense empregando medidas como os circuítos diferenciados para pacientes covid, o uso de máscara por todos os profesionais ou a realización de probas a pacientes.
