Por Europa Press / Redacción | SANTIAGO DE COMPOSTELA | 23/01/2023 | Actualizada ás 13:19
Nacionalistas e socialistas criticaron duramente a proposta de Feijóo de que goberne a lista máis votada. Así, a portavoz nacional do BNG, Ana Pontón, considera que ao presidente do PP, Alberto Núñez Feijóo, "non lle dan as contas" e "ten un problema coa democracia" ao volver propor un pacto para que goberne sempre a lista máis votada tras próximas citas electorais.
Preguntada respecto diso na súa habitual rolda de prensa dos luns no Parlamento galego, Pontón avogou por manter o sistema actual porque, pola contra, gobernaría "unha minoría". "Nós estamos coa democracia e con que gobernen as maiorías que elixen os cidadáns. Non sei por que isto moléstalle ao Partido Popular", esgrimiu.
A líder da oposición galega lembrou que esta é unha proposta "moi vella" que leva escoitando uns "30 anos" e achacouno agora a que o líder popular "cre que non lle vai ir ben nas municipais e quere cambiar as regras de xogo".
"Vemos que o PP ten un problema coa democracia", apuntou, para insistir en que o método das maiorías é "perfectamente lexítimo". "Feijóo está nervioso porque cre que o seu liderado fai augas e cre que nas municipais non lle vai a ir ben", sentenciou Pontón.
PSdeG
Pola súa banda, o portavoz do Grupo Socialista na Cámara galega, Luís Álvarez, insistiu en que o presidente do PP, Alberto Núñez Feijóo, "non está en condicións de dar leccións nin de facer propostas de rexeneración democrática". Na habitual rolda de prensa dos luns no Parlamento de Galicia, Álvarez subliñou que este "plan de sanidade institucional é o mesmo tipo de receitas que presenta o Partido Popular cando non goberna".
Deste xeito, o portavoz dos socialistas destacou que "hai que lembrarlle a Feijóo que a lista máis votada nas últimas xerais é a do Psoe". Así, apuntou que "o que debería de facer Feijóo é deixalo gobernar e non estar a cuestionar a súa lexitimidade".
Nesta liña, Álvarez lembrou que o Consello Xeral do Poder Xudicial "leva 1.509 días bloqueado por alguén que se permite dar leccións de como orientar democraticamente este país".
PPdeG
Pola contra, o portavoz parlamentario do PPdeG, Pedro Puy, sinalou, ante a proposta do presidente do PP, Alberto Núñez Feijóo, que goberne sempre a lista máis votada tras próximas citas electorais, que esta opción "trata de reforzar as institucións democráticas" e de "dar estabilización aos gobernos, sobre todo, no ámbito municipal".
Preguntado respecto diso na súa habitual rolda de prensa dos luns no Parlamento galego, Puy insistiu en varias ocasións en que "non coñece o documento de forma completa", pero que "é acertado abordar a situación das institucións en España con afán constitutivo para consolidalas".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.