Rajoy sobre a reforma do delito de sedición: "Non é europeo nin democrático"
O expresidente cualifica de Goberno "Frankenstein" o actual Executivo de Sánchez mentres Rueda di de Rajoy que "non é un vaso chinés".
Por Europa Press / Redacción | SANTIAGO DE COMPOSTELA | 23/01/2023 | Actualizada ás 19:51
O expresidente do Goberno Mariano Rajoy considera que a reforma do delito de sedición levada a cabo polo Executivo de Pedro Sánchez non ten encaixe nos "valores" da Unión Europea, xa que foi realizada por "razóns políticas". "Non é europeo, nin liberal, nin democrático", sinalou.
Rajoy foi o protagonista este luns da clase maxistral dos actos da celebración de San Raimundo de Peñafort, patrón dos xuristas, na Facultade de Dereito de Santiago de Compostela, onde estivo acompañado do presidente da Xunta, Alfonso Rueda.
Ao comezo da súa intervención, o exmandatario mostrou o seu orgullo pola invitación, dada a súa condición de "santiagués" e de alumno de Dereito da USC, na que se graduó na promoción de 1972 a 1977, a última antes do traslado da facultade ao seu emprazamento actual. O asunto elixido por Rajoy para o seu relatorio foi "os populismos", que representan para o expresidente "a maior ameaza" existente para a Unión Europea e as "democracias liberais".
Durante o seu discurso, Rajoy lanzou críticas ao expresidente grego, Alexis Tsipras, ou ao independentismo catalán, aos que acusou de "infantilizar" a opinión pública, outro dos trazos que, para o exmandatario galego, caracterizan o populismo. Cre que asumen "o monopolio da moral, a decencia e a honradez" co que conseguen "poralizar" á sociedade rompendo "consensos" como o que, di, conseguiuse durante a Transición.
"Nunca houbo un momento de maior polarización que agora", espetou Rajoy, que atribúe a responsabilidade deste contexto ao "goberno Frankestein", como definiu aos apoios do Partido Socialista desde a moción de censura que terminou coa súa presidencia en 2018.
SOLUCIÓNS DE RAJOY
O final do seu discurso foi empregado polo expresidente para achegar as solucións que, ao seu xuízo, deberían porse sobre a mesa para atallar os "perigos" para a Unión Europea que supoñen a influencia na política de forzas "de extrema esquerda, de extrema dereita e de extrema nada".
O exmandatario resumiu esta receita en "dúas palabras": "máis unión e máis competencias". En primeiro lugar, Rajoy ve fundamental "volver ao control do gasto público" para, a continuación, acompañar esta contención orzamentaria en "reformas" para reforzar a "competitividade" do vello continente.
RUEDA ELOXIA A RAJOY
O encargado de introducir o discurso de Rajoy foi o presidente da Xunta, Alfonso Rueda, quen enxalzou a traxectoria política dunha persoa "que non necesita autoproclamar a súa talla nin reescribir o pasado".
Agora, o xefe do Goberno galego cre que Rajoy soubo atopar o seu sitio como expresidente, pois "non está a ser un vaso chinés". "Sabe o lugar que ocupa e realiza achegas moi valiosas para o presente e o futuro do país", apostilou.
