Secretarios xudiciais cifran en case o 60 % o seguimento da folga en Galicia, con centos de vistas suspendidas

Os letrados da Administración de Xustiza en Galicia (antes denominados secretarios xudiciais) estiman en case un 60 % o seguimento medio da folga indefinida nesta comunidade, con centos de xuízos suspendidos, así como outros trámites, entre os que están os mandatos de pago de indemnizacións, pensións, costas, etc.

Segundo explicou a Europa Press a delegada en Galicia da Unión Progresista dos Letrados da Administración de Xustiza (UPSJ), Estefanía Ave Prieto, o seguimento do paro é mesmo maior, tendo en conta que os cálculos se fixeron sobre os secretarios xudiciais que están a traballar e sen ter en conta a aqueles funcionarios de baixa ou permiso.

Así, explicou que, na provincia da Coruña, o seguimento estimado é do 61 %; na de Ourense, do 62 %; na de Pontevedra, do 51 %; e na de Lugo, do 58 %. Tamén apuntou que, aínda que é difícil facer un cálculo, pode afirmarse que foron suspendidos centos de xuízos en Galicia (só en Vigo a cifra rolda os 180).

Con todo, matizou, a folga indefinida non repercute unicamente na suspensión de vistas, senón que deixan de facerse outros trámites, entre eles os mandamentos de pago. Segundo explicou Estefanía Ave, entre pagos de pensións, costas, indemnizacións, multas, etc., cada día "pasan" polas mesas dos letrados de administración de xustiza de Galicia uns 3 millóns de euros, cuxo pago está agora paralizado.

A nivel nacional, o comité de folga cifrou nun 81 % o seguimento do paro, a pesar dos "abusivos servizos mínimos", e os intentos do Ministerio de Xustiza de "minimizar" os efectos da folga. Ademais de melloras nas súas condicións de traballo (adecuación salarial, un marco de representación independente e propio,...), os folguistas reclaman o cesamento do secretario de Estado, Tontxu Rodríguez, polos "gravísimos ataques" a este colectivo de "servidores públicos".

Cartel informativo ás portas dun xulgado de Vigo, sobre a suspensión de vistas debida á folga indefinida dos letrados da administración de xustiza. | Fonte: Europa Press