Por Europa Press / Redacción | SANTIAGO DE COMPOSTELA | 25/01/2023 | Actualizada ás 12:56
O conselleiro de Cultura, Educación, Formación Profesional e Universidades, Román Rodríguez, avanzou a intención da Xunta de reclamar ao Estado un plan específico para mellora de infraestruturas educativas en España e, en particular, en Galicia.
Fíxoo durante unha comparecencia no Parlamento galego, onde, segundo anunciou, presentarán proximamente esta iniciativa para o uso de fondos europeos para este fin. Foi aproveitando unha pregunta do deputado nacionalista Ramón Fernández, na que este demandou a reparación de "infraestruturas deterioradas" no IES Concepción Arenal de Ferrol ante o estado de "abandono" do edificio, expuxo.
O conselleiro rexeitou estas acusacións e vinculou esta petición no Parlamento galego coa proximidade das eleccións municipais. "Non hai abandono educativo en Ferrol", dixo ao cifrar en máis de cinco millóns de euros o investimento nesta cidade nesta materia.
A eles, sumou outros 600.000 euros "nos últimos anos" no IES Concepción Arenal. Do mesmo xeito, manifestou tamén que se está actuando baixo os criterios da "unidade técnica". "Cando se fala dun novo espazo para educación física hai que ter en conta se é viable ou non", afirmou en referencia á propia localización do centro. "Hai que ver que alternativas hai", engadiu sobre as actuacións a acometer.
Por outra banda, en resposta a unha pregunta do deputado do PPdeG Ovidio Rodeiro sobre a Formación Profesional básica, o conselleiro apelou á "aposta de futuro" da Xunta pola mesma como unha forma de "reducir o fracaso escolar".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.