Por E.P. | SANTIAGO DE COMPOSTELA | 25/01/2023 | Actualizada ás 14:07
Os operarios de Adif traballan no punto do descarrilamento do tren en Lalín para restablecer a circulación de trens no prazo estimado --ofrecido este martes-- de 48 horas.
Tras retirar 13 vagóns que non descarrilaran, durante a xornada deste mércores realízanse traballos para liberar a vía e apartado do resto de tren, con axuda de dous guindastres de gran tonelaxe.
De forma simultánea, realízanse labores para retirar o material descarrilado e para asegurar a trincheira que caeu.
As mesmas fontes de Adif confirmaron a Europa Press que non está previsto que se restableza a circulación ata que non se despexe a infraestrutura e se poidan reparar os danos ocasionados. Unha vez despexada, haberá que reparar 180 metros de vía e travesas.
Mentres tanto, están afectados dous trens de media distancia que unen Ourense e Santiago de Compostela, con saída ás 16,00 horas nese percorrido e ás 18,40 en sentido inverso. Renfe traslada aos viaxeiros destas frecuencias en autobús, mentres que está paralizado o transporte de mercadorías por esta vía convencional.
DESCARRILAMENTO
Sobre as 9,10 horas deste mércores, un tren de transporte de mercadorías non perigosas, que cubría a ruta Santiago-Ourense, descarrilou tras bater cun derrubamento sobre a vía.
A locomotora e varios vagóns, que non levaban nese momento ningún material, quedaron envorcados lateralmente, mentres que o maquinista puido saír coa axuda dos Bombeiros de Silleda, que non tiveron que empregar o material de excarceración. O home resultou ferido leve.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.