Ampliado a fin de ano pola Deputación de Pontevedra o prazo das obras do Plan ReacPon
A decisión xustificouse por circunstancias como o incremento xeneralizado dos prezos, pola falta de materiais e as inclemencias meteorolóxicas que retardaron varias das actuacións nestes últimos meses.
Por E.P. | SANTIAGO DE COMPOSTELA | 27/01/2023 | Actualizada ás 18:08
O Pleno da Deputación de Pontevedra aprobou este venres, por unanimidade, unha ampliación de 8 meses no prazo de execución do plan ReacPon (Reacciona Pontevedra) para financiar grandes equipamentos e dotacións municipais, un plan que está a mobilizar un total de 40 millóns de euros.
O final deste prazo estaba fixado nas bases para o próximo 30 de abril e agora prolóngase ata o 31 de decembro, dando así as "máximas facilidades" para que as obras cheguen a bo porto, atendendo ás peticións formuladas por algúns concellos co obxectivo, como remarcou o deputado de Cooperación, Santos Héctor, de que "non se perda un só euro en ningún concello".
A decisión xustificouse por circunstancias como o incremento xeneralizado dos prezos, pola falta de materiais e as inclemencias meteorolóxicas que retardaron varias das actuacións nestes últimos meses.
INUNDACIÓNS
No Pleno viviuse tamén unha situación curiosa coa rectificación no último momento do grupo provincial do Partido Popular que, a preguntas da presidenta Carmela Silva, despois de votar en contra do acordo durante a mesma sesión plenaria, finalmente apoiou a proposta de repartir axudas complementarias polas inundacións de decembro e deste mes de xaneiro.
O Partido Socialista e o BNG lembraron que a concesión destas axudas é de competencia exclusiva da Xunta de Galicia e que a Deputación, "que carece absolutamente de competencia algunha para atender os danos causados por emerxencias", porá en marcha un Plan Complementario de axudas sempre que a Xunta declare a Emerxencia de Interese Galego e aprobe o Decreto co ámbito afectado e as indemnizacións autonómicas.
Os populares rexeitaban inicialmente a proposta dos grupos do Goberno porque condicionaban esas axudas a un convenio entre a Xunta, o Estado e a Deputación.
Por outra banda, o Pleno rexeitou unha moción do PP para incrementar a dotación e medios da Garda Civil no rural da provincia e outra moción tamén popular para demandar ao Goberno do Estado o incremento dos fondos europeos DUS5000 para atender todas as solicitudes dos concellos que foron desestimadas.
