Defensa da Sanidade: "A protesta demostra que o Sergas non é de fiar e falsea a realidade"

A Asociación Galega en Defensa da Sanidade Pública (AGDSP) considera un "rotundo éxito" a manifestación celebrada este domingo en Santiago e na que participaron miles de persoas. Á vez, ve "desesperadas" as medidas para o Sergas anunciadas pola Xunta a semana pasada.

A través dun comunicado remitido a medios este luns, o colectivo apunta que estas solucións  consisten "basicamente en ofertar 400 prazas en propiedade" a través de concurso de méritos --sen oposición--, o que tacha de "cacicada".

Ademais, engade a AGDSP, a creación destas prazas "contradí o argumento esgrimido pola Consellería de Sanidade, de que non hai médicos para contratar". "Isto demostra unha vez máis que a administración sanitaria galega non é de fiar e falsea a realidade con ocorrencias atropeladas", lamenta.

A asociación sinala que estas medidas foron adoptadas "de maneira precipitada tras anos de falta dunha política de persoal desastrosa baseada na estabilidade e a precariedade" do persoal de Atención Primaria. "Consideremos que é unha reacción á desesperada, destinada a frear o apoio profesional á manifestación convocada pola Plataforma SOS Sanidade", engade.

GARDAS NOS PAC

Xunto a estas prazas, a Asociación en Defensa da Sanidade Pública afea a pretensión do Sergas de "ofertar un sobresueldo" a médicos que fagan gardas nos puntos de atención continuada para "ampliar a actividade de profesionais sometidos a unha presión asistencial desbordante".

"Suporía un risco para a poboación, xa que incrementaría a posibilidade de erros médicos", alerta, para seguidamente concluír que o que precisa o persoal sanitario é "estabilidade e unhas condicións laborais dignas e xustas".

REACCIÓNS GOBERNO 

A ministra portavoz do Goberno, Isabel Rodríguez, arremeteu este luns contra o líder do PP, Alberto Núñez Feijóo, por achacar ao Executivo central a situación da sanidade pública tras as manifestacións do domingo e lembroulle que é unha competencia transferida ás comunidades autónomas.

"Non deixou de sorprenderme que o líder do principal partido da oposición, que xestionou a sanidade pública en Galicia, onde tamén se mobilizabaron onte os profesionais sanitarios, veña a responsabilizar ao Goberno de España desta situación", afeoulle en declaracións a Telecinco, recollidas por Europa Press.

Rodríguez defendeu que o goberno de PSOE e Unidas Podemos está a dar a volta a "toda unha era de recortes" en sanidade cando gobernaba Mariano Rajoy e preguntou a Feijóo se considera, "como dicía Rajoy", que en sanidade os españois viven por enriba das súas posibilidades "ou, pola contra, cre que hai que investir máis" e "non insultar aos sanitarios, senón reforzar as súas condicións de traballo".