Ciaim emitirá nos próximos días un informe provisional da investigación do Pitanxo, cando se cumpre un ano do naufraxio

Este documento recollerá datos obxectivos do ocorrido, pero non incluirá as hipóteses e as análises do suceso, nin as conclusións sobre as causas do accidente

Por E.P. | VIGO | 13/02/2023 | Actualizada ás 18:20

Comparte esta noticia

A Comisión Permanente de Investigación de Accidentes e Incidentes Marítimos (Ciaim) informou ás familias dos 21 falecidos no 'Villa de Pitanxo' de que nos próximos días emitirá un informe provisional da investigación da traxedia.

Tal como indicou a Ciaim nun correo electrónico enviado aos familiares, este documento recollerá datos obxectivos do ocorrido, pero non incluirá as hipóteses e as análises do suceso, nin as conclusións sobre as causas do accidente, "que só se emitirán cando se peche a investigación".

A pesar diso, a Comisión recoñeceu que xa finalizou os primeiros ensaios co modelo do buque no laboratorio de dinámica mariña, simulando a navegación do barco nas condicións climáticas que había no momento do afundimento.

Así, comprobouse o comportamento do Pitanxo nas distintas condicións de carga e de arrastre da arte de pesca de acordo coas principais hipóteses sobre as circunstancias do accedente que manexa a Ciaim.

"Os resultados destes ensaios serán analizados coas demais evidencias sobre o accidente dispoñibles pola Ciaim, nun proceso que se realizará nas últimas fases da investigación", engadiu.

Entre outros datos, a Ciaim explicou que a operación de baixa ao pecio levará a cabo ao longo do próximo verán e desenvolverase en varias fases. Primeiro explorarase o fondo mariño para atopar o barco afundido. Logo procederase á inspección visual do pecio cun robot dotado de cámaras para examinar distintos aspectos do buque, dos seus equipos, das súas artes de pesca e do fondo mariño.

Todo iso cando se cumpre un ano da traxedia, ocorrida o 15 de febreiro de 2022, cando perderon a vida 21 dos 24 mariñeiros a bordo do Pitanxo. Por iso, a Ciaim ten que emitir o seu informe, xa que o regulamento indica que debe facelo antes de que transcorra un ano a partir do naufraxio. Con todo, será provisional e verá a luz nos días posteriores á reunión do seu Pleno, que se celebrará o vindeiro xoves 16 de febreiro.

María José de Pazo, Ramón Porto, Alfonso Rueda, María Pilar Ramallo, Rosa Quintana e Samuel Kwesi nun acto homenaxe a mariñeiros da Praia Menduiña 2.. PEDRO DAVILA-EUROPA PRESS
María José de Pazo, Ramón Porto, Alfonso Rueda, María Pilar Ramallo, Rosa Quintana e Samuel Kwesi nun acto homenaxe a mariñeiros da Praia Menduiña 2.. PEDRO DAVILA-EUROPA PRESS | Fonte: Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta