Sabes quen é José Gil, "o pai do cinema galego"?

A Deputación de Pontevedra, en colaboración con Vía Láctea Films, Cinema na Rúa e a Editorial Galaxia, porá en marcha un proxecto cultural multidisciplinar para dar a coñecer, en 30 municipios da provincia, a figura de José Gil (1870-1937), "o pai do cinema galego".

Esta iniciativa, 'José Gil. Pontevedra, provincia de cinema. Na orixe do cinema', foi presentada este martes en Vigo pola presidenta da Deputación, Carmela Silva; o alcalde da cidade olívica, Abel Caballero; rexedores e rexedoras dos concellos; e responsables das entidades cooperadoras.

"Este é un proxecto emocionante, de coñecemento e recoñecemento ao primeiro cineasta galego, ao pai do cinema galego", explicou Silva, quen lamentou que, sendo Galicia unha comunidade punteira no sector audiovisual, "incomprensiblemente" a figura de José Gil é case descoñecida.

A través de exposicións, concertos, proxeccións e outras actividades (como a presentación do libro biográfico 'Nos días encantados de agosto', de Manolo González e editado por Galaxia), que comezarán nas Neves o próximo 24 de febreiro, preténdese "recuperar a historia" de Gil, que tamén exerceu como fotógrafo. O proxecto percorrerá 30 municipios ata finalizar en decembro, en Ponteareas.

Gil, prolífico cineasta que rodou máis de 150 películas, das que só se conservan 7, era "un visionario", segundo explicou a presidenta da Deputación e, coa súa obra, difundiu non só cinema senón tamén a Galicia que o rodeaba.

Pola súa banda, Abel Caballero destacou o papel do cinema como expresión cultural que "cambiou o mundo". Segundo apuntou, José Gil levaba o cinema alí onde non o había, a través un vehículo 'cinemóvil', para facer partícipe a todo o mundo dese avance tecnolóxico e cultural. Ademais, lembrou que o fotógrafo e cineasta tivo vinculación coa cidade olívica, onde ten unha rúa co seu nome, e mesmo a súa figura aparece en documentos gráficos de época.

PROGRAMACIÓN

O proxecto, tras o seu inicio nas Neves (24 e 25 de febreiro), percorrerá os municipios de Cuntis, Cambados, A Guarda, Caldas, Mondariz, O Grove, Poio, Baiona, Redondela, Gondomar, Nigrán, Arbo, Mondariz-Balneario, Soutomaior, O Porriño, Bueu, Cangas, Pontecesures, Lalín, Sanxenxo, Pontevedra, Tui, Vigo, Covelo, Moaña, Salvaterra, Marín e Vilagarcía, para acabar en Ponteareas (1 e 3 de decembro).

En cada un destes concellos, José Gil ocupará o espazo público durante un fin de semana, con actividades como o Cinemóbil (que leva no seu interior 16 paneis explicativos sobre a vida e traxectoria do cineasta), encontros coa comunidade educativa, proxección de traballos audiovisuais, ou a presentación do libro de Manolo González.

Tamén haberá actuacións en directo, coas bandas de música de cada municipio, que interpretarán un programa composto por obras relacionadas coa vida de José Gil, e estará dispoñible un espazo web con información sobre este creador e o seu traballo.

Presentación do proxecto 'José Gil. Pontevedra, provincia de cinema. Na orixe do cinema', en cálea Príncipe de Vigo. | Fonte: Europa Press