O intercambio cultural con Portugal e Lationamérica protagoniza a terceira edición de "Residencias Artísticas do Gaiás"

A terceira edición do programa de Residencias Artísticas do Gaiás aposta pola internacionalización e o intercambio cultural con Portugal e América Latina, coa participación dos seus artistas no ciclo teatral 'Clásicas Desfeitas'.

O Centro Dramático Galego, unha das entidades que colaboran neste programa, presenta en marzo os volumes seis, sete e oito deste ciclo que contará coa directora artística da Compañía Nacional de Teatro de México, Aurora Cano, o director artístico uruguaio do Mura, Iván Solarich e un elenco de artistas de Portugal, Cuba, Uruguai e México.

Así o avanzou este xoves o director xeral de Cultura, Anxo Lorenzo, durante o acto de presentación do proxecto, que achega tamén este ano a segunda convocatoria das 'Bolsas REGA', en virtude das cales se proporcionará a catro proxectos artísticos recursos humanos, técnicos e unha dotación de 8.000 euros para desenvolver a súa actividade.

VIDEOXOGOS E ESTUDOS DO PATRIMONIO

Segundo trasladou a directora xerente da Cidade da Cultura, Ana Isabel Vázquez, o programa Residencias do Gaiás, polo que pasaron máis de 50 iniciativas, está a dar "moitos froitos" grazas á dotación de espazos, recursos e tempo para que se materialicen proxectos artísticos.

En canto ás novidades, Vázquez comentou a Europa Press a modificación da residencia de videoxogos e un proxecto 'radicalmente diferente' orientado a estudos do patrimonio en colaboración co Centro Superior de Investigacións Científicas (CSIC).