Denuncian que o CHUS está cancelando revisións aos pacientes de oncoloxía "sen explicación algunha"

A Asociación de Pacientes e Usuarios do CHUS denuncia que o servizo de oncoloxía e a xerencia do hospital cancelaron as citas de revisión dos pacientes de cancro, “sen causa aparente e sen explicación algunha”. Segundo sinalan, esta cancelación faise vulnerando o artigo 9 da Orde do 13 de xullo de 2004 que establece o principio de estabilidade da axendas e prohibe, salvo casos excepcionais autorizados e motivados, que existan, como está acontecendo agora de xeito xeneralizado, que haxa pacientes en espera dunha asignación de cita.

Indican que os pacientes de cancro “xa teñen dabondo” como para que tamén teñan que fracer fronte a un “maltrato asistencial” por parte do Sergas. “Semella que para o Sergas sufrir un cancro non é suficiente para os/as pacientes, e prefire tensar aínda máis a corda dos/as pacientes oncolóxicos/as, poñendo atrancos na atención sanitaria máis básica requirida para o tratamento e curación que non fan senón aumentar exponencialmente o risco de morte e de secuelas irreparables”, lamentan.

Remarcan que o cancro necesita dunha revisión constante para o seu control e detección e para paliar os efectos dos tratamentos. “Calquera atraso, por pequeno que sexa, pode supoñer a diferenza entre a vida e a morte, entre os tratamentos curativos e os paliativos”.

Ante iso, os pacientes de cancro están vendo como lle cancelan as citas de revisión periódicas pautadas polos/as oncólogos/as por vía telefónica e sen previsión de cando se volverá a citar aos/ás pacientes. Isto está “situándoos ao bordo do precipicio, condenándoos/as a un maior risco de morte do que o que ten a propia enfermidade, e a uns índices de ansiedade, nerviosismo e malestar que en nada contribúen á súa saúde e recuperación, obrigándoos  a maiores  gastos e a ter irremediablemente que acudir á privada para non poñer en risco as súas vidas”, enfaitizan.

Entón, desde a Asociación, piden a todos os familiares e pacientes a poñer unha reclamación canto antes para que se segue co tratamento oncolóxico “coa máxima urxencia”.