Protestas en Monforte contra o caso dunha menor presuntamente obrigada a prostituírse

Os feitos foron consentidos pola súa nai que está investigada por indución á prostitución.

Por Erik Dobaño | SANTIAGO DE COMPOSTELA | 23/02/2023 | Actualizada ás 21:58

Comparte esta noticia

Varias decenas de persoas saíron na tarde noite deste xoves ás rúas de Monforte para mostrar a súa repulsa ante o caso dunha menor presuntamente agredida sexualmente por un octoxenario, uns feitos supostamente consentidos pola súa nai, á que se investiga pola súa posible implicación na prostitución da súa filla.

Convocados pola asociación feminista Fem-Forte, decenas de persoas concentráronse baixo a choiva e nunha fría noite na Praza de España da localidade monfortina. Alí, os concentrados apelaron a tomar conciencia sobre as violencias que sofren as mulleres e chamaron a atención ás administracións e institucións para que velen polos dereitos das menores. Ademais, as portavoces da plataforma convocante puxeron o acento na necesidade de articular mecanismos para a detección de posibles casos de prostitución infantil.

DOUS DETIDOS

Dúas persoas, un octoxenario e a nai da menor, foron detidas por estes feitos, denunciados pola propia vítima, que asegura que as agresións foron consentidas pola súa nai e que comezaron cando tiña 10 anos.

Os arrestados quedaron en liberdade por orde dun xulgado de Monforte cunha orde de afastamento da menor e a prohibición de comunicarse con ela. O octoxenario está investigado por un presunto delito de agresión sexual sobre menor de 16 anos e outro de aceptación proposta prostitución. Así mesmo, a muller está a ser investigada por indución á prostitución. Ademais, os axentes céntranse agora en investigar a outros homes, todos eles de avanzada idade, por presuntos abusos á nova.

AMIGOS DE GALICIA ESTUDA PERSONARSE

Doutra banda, a entidade sen ánimo de lucro Fundación Amigos de Galicia apuntou que "a súa intención é personarse" neste caso, xa que un dos obxectivos "é a protección da infancia, sobre todo, en casos como estes en os que a familia ten conflito de intereses".

Segundo trasladaron a entidade a Europa Press, "aínda non saben nada do xuízo", pero "xa se puxeron en contacto" coa súa procuradora para que "lles informe da situación do caso".

Manifestación contra a violencia machista | AXM
Manifestación contra a violencia machista | AXM

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta