A Xunta crea unha área de Turismo Termal para proxectar Galicia como "un referente no termalismo"
Terá a sede en Ourense e encargarase de "coordinar e asumir" todas as decisións e iniciatvias en materia de termalismo
Por E.P. | SANTIAGO DE COMPOSTELA | 24/02/2023 | Actualizada ás 16:46
O Diario Oficial de Galicia (DOG) publica este venres a creación da área de Turismo Termal, con sede en Ourense, tal e como anunciara o presidente da Xunta, Alfonso Rueda, na rolda de prensa posterior ao Consello do 16 de febreiro. Esta sección "ten como principal obxectivo a proxección exterior de Galicia como un referente no termalismo".
Nun comunicado lembraban que Galicia "é a primeira potencia termal de España, en gran parte grazas a Ourense, que é a segunda cidade europea con máis fontes termais, de aí a localización da área", que se encargará de "coordinar e asumir" todas as decisións e iniciatvias en materia de termalismo, cuxas competencias están agora repartidas entre diferentes Consellerías".
Esta área, integrada na dirección da Axencia de Turismo de Galicia, "potenciará a posta en valor turístico dos recursos naturais e culturais vinculados ao termalismo en Galicia, estruturando a oferta, os recursos e os servizos de forma que conduzan ao impulso de Galicia como destino termal".
Entre as súas funcións estará a de fomentar a modernización de infraestruturas existentes e crear outras novas; diversificar o sector para atraer a novos segmentos de poboación; promover a integración do termalismo galego en proxectos europeos de turismo de saúde; ou a creación dunha marca propia que identifique o turismo termal galego.
