A Deputación de Pontevedra inviste máis de once millóns de euros "para garantir dereitos e servizos na provincia"
A presidenta Carmela Silva informou da aprobación de novas actuacións de iluminación sustentable con fondos procedentes do IDEA, unha entidade pública empresarial do MITMA.
Por E.P. | SANTIAGO DE COMPOSTELA | 03/03/2023 | Actualizada ás 16:28
A presidenta da Deputación de Pontevedra, Carmela Silva, deu conta este venres dos asuntos abordados na xunta de goberno provincial na que se mobilizaron outros 11,1 millóns de euros "para seguir garantindo dereitos e servizos na provincia". Son recursos en materia de cooperación cos concellos, infraestruturas, iluminación sustentable e deportes que chegan a un total de 29 concellos.
En materia de cooperación, aprobáronse 4,2 millóns de euros en 19 axudas do Plan Concellos e outros 2,7 millóns de euros incluídos no Plan de Inundacións para facer fronte aos danos causados polas choivas entre o 23 de decembro e o 3 de xaneiro.
Respecto das infraestruturas destinaranse 2,7 millóns de euros á Ponte das Achas e ás estradas provinciais EP-0104 (Ramal-Igrexa de Figueirido, en Vilaboa) EP-8004 (Caldas de Reis-Vilanoviña) e EP-7201 (Cachafeiro-Silleda).
Carmela Silva tamén informou da aprobación de novas actuacións de iluminación sustentable con fondos procedentes do Instituto para a Diversificación e Aforro da Enerxía, IDEA, unha entidade pública empresarial do Ministerio para a Transición Ecolóxica e o Reto Demográfico. En total, será un millón de euros en actuacións nos concellos de Arbo, Pazos de Borbén, Porriño, Tomiño, Tui, Meaño, Meis e Vilanova de Arousa.
E en canto ao deporte, o Goberno provincial aprobou 500.000 euros en axudas a clubs náuticos que participan en competicións oficiais neste ano 2023, distribuídos da seguinte maneira: Piragüismo, 280.000 euros; Remo, 145.000 euros e Vea, 75.000 euros. Ademais, Carmela Silva anunciou un investimento 800.000 euros para unha senda peonil que conduce ao Mosteiro de Carboeiro, en Silleda.
FILM COMMISSION
Por outra banda, Carmela Silva tamén informou das actividades que está a desenvolver estes días a Pontevedra Provincia Film Commission que organizou esta semana unha viaxe de familiarización con representantes de produtoras estatais e internacionais "para avanzar no noso obxectivo de atraer rodaxes cinematográficas".
Durante esta actividade estes profesionais puideron coñecer espazos relacionados co patrimonio cultural e natural para posibles localizacións das súas producións audiovisuais en localidades como Baiona, Oia, A Guarda, Tui, Bueu, Pontevedra e Vigo.
O vindeiro luns daranse os detalles da Gala do Turismo, que terá lugar o 10 de marzo organizada pola Deputación de Pontevedra e que, segundo avanzou a presidenta, "será espectacular".
