O BNG acusa á Xunta de "facer propaganda" coas axudas polos incendios do pasado verán

A deputada do BNG María González Albert denunciou que a Xunta "fixo propaganda" coas axudas para reparación de danos polos incendios do verán pasado, ao que o director xeral de Gandaría, Agricultura e Industrias Agroalimentarias, José Balseiros, respondeu que "pensa o ladrón que todos son da súa condición".

En comisión parlamentaria, a nacionalista advertiu de solicitudes que se quedaron fóra e tamén doutras casuísticas, como que a Xunta "non está a facer un seguimento de que esas axudas sirvan" para o que se formularon.

Na súa quenda, Balseiros aplaudiu que a parlamentaria do Bloque "recoñeceu que a Xunta actuou con moita axilidade" neste asunto, pero recriminoulle que "pon en dúbida que as axudas son para restituír os danos ou para un efecto propagandístico".

Pola súa banda, González Albert replicou que, coa súa intervención, o alto cargo "confirmou" os "peores temores" do seu grupo. "Vostedes fixeron propaganda con isto", aseverou. Ademais, acusoulle de dicir "mentiras", polas 77 vivendas que, segundo os seus datos, recibiron axudas, entre as que "faltan algunhas por pagar pendentes de que xustifiquen" os gastos. "Está a dicirme que todas as que pagaron xustificaron?", interrogoulle.

NOVA ORDE E IGAPE

Respecto dunha das "dúbidas" concretas da portavoz do Bloque, sobre os castiñeiros de particulares, lembrou que "se está traballando nunha orde para os que non puideron acudir" ata agora. E en relación coa súa pregunta sobre o Igape, informou de que "se presentaron tres solicitudes" e "aprobáronse dúas", xa que "unha tivo que ser denegada".