Medra a idignación no sector percebeiro tras a apertura de zonas para extracción de mexilla: "É unha baixada de pantalóns"

As confrarías de Pescadores do sector de percebe da provincia de Pontevedra mostraron este luns a súa "indignación" despois de que a Consellería do Mar autorizase a apertura de novas zonas para a extracción de mexilla. "É unha baixada pantalóns", sinalan.

Os 'percebeiros' consideran que se trata de "unha chapuza política" na que a Consellería "primou o poderío económico por encima do colectivo máis débil e formado na súa modalidade do montón maioritariamente por mulleres".

Así, aseguran que a apertura de áreas para a extracción de mexilla "nas zonas máis ricas de percebe, que foran declaradas pola propia Consellería como exclusivas para a extracción do crustáceo", "non merecen respecto algún nin máis colaboración por parte das confrarías de percebe".

Así mesmo, tras reunirse este luns, as confrarías pontevedresas acordaron solicitar con carácter de urxencia unha reunión das confrarías de percebe na Federación Galega, co obxectivo de abordar este "atropelo" da Xunta e de acordar "medidas contundentes".

Do mesmo xeito, nunha nota de prensa, os 'percebeiros' denuncian "falta de actuación" do Servizo de Gardacostas que, segundo apuntan, "sendo testemuñas do incumprimento manifesto dos 'bateeiros' accedendo a zonas vedadas para a extracción de mexilla, non levantaron ningunha acta aos presuntos infractores".

PRODUTORES DE MEXILLÓN, SATISFEITOS

Mentres, as principais organizacións de produtores de mexillón de Galicia (Opmega, Amegrove e Socomgal) aseguran que nas novas zonas ás que acudiron a traballar este luns "con normalidade" os seus asociados atoparon mexilla "aparentemente de calidade".

Con todo, estas asociacións afirman que son conscientes de que deben seguir traballando coa Xunta para "seguir sumando espazos de recollida", para que, deste xeito, "a actividade volva á normalidade e que se volva a falar do mexillón de Galicia en positivo".