A mellora da estrada vella que une Pontevedra e Marín estará lista "como moi tarde" no 2025
Case dous anos despois do accidente mortal ocorrido en Estribela (en maio de 2021), no que faleceu unha muller de 68 e a súa neta, de seis, resultou ferida grave, o Goberno galego confirmou o horizonte desta remodelación
Por E.P. | SANTIAGO DE COMPOSTELA | 28/03/2023 | Actualizada ás 15:32
A mellora da mobilidade entre Pontevedra e Marín a través da coñecida como estrada vella será unha realidade, segundo as previsións achegadas polo presidente da Xunta, Alfonso Rueda, como moi tarde o primeiro trimestre de 2025, é dicir, teñen un horizonte de dous anos.
Case dous anos despois do accidente mortal ocorrido en Estribela (en maio de 2021), no que faleceu unha muller de 68 e a súa neta, de seis, resultou ferida grave, o Goberno galego confirmou o horizonte desta remodelación que deu os seus primeiros pasos en agosto de 2021 co anuncio dun estudo de viabilidade para definir as obras en todo o viario.
Este martes, o mandatario autonómico volveu a presentar a reforma da estrada vella, na que a Administración autonómica previu un investimento de case 10 millóns para transformar esta vía autonómica PO-546 nun Eixo de Mobilidade Sustentable que inclúa senllas peonís e ciclistas e que mellore a seguridade viaria da veciñanza.
Rueda, que estivo acompañado pola conselleira de Infraestruturas e Mobilidade, Ethel Vázquez, recalcou que con esta actuación dáse "un paso moi importante e fundamental para facer transitable unha zona que non a era", lembrando que Pontevedra e Marín "sempre estiveron unidas, pero faltáballes unha vía que non fose só para vehículos e que contase con seguridade viaria".
Co obxectivo de que "os peóns gañen terreo aos vehículos" nesta estrada pola que transitan cada día ata 5.000 vehículos, están a executarse as obras da primeira fase de remodelación da zona de Estribela. O próximo mes licitaranse as obras para a segunda fase, cun investimento total de 1,35 millóns de euros neste tramo.
Ademais, o presidente autonómico tamén anunciou que en abril se vai a licitar o proxecto de execución de melloras nos 3,5 quilómetros que separan Os Praceres e Mollabao. Deste xeito, destinaranse case 6,7 millóns de euros a mellorar a seguridade viaria con pasos de peóns máis seguros e beirarrúas máis anchas, remodelaranse paradas de autobús, habilitaranse senllas peonís e ciclistas e instalarase un miradoiro e zonas verdes.
A estas actuacións súmanse outras nos tramos urbanos de Marín, con 1,12 millóns de euros de investimento, e a instalación dun aparcadoiro disuasorio en Pontevedra que terá 71 prazas de estacionamento e ao que se destinarán 510.000 euros.
Rueda espera que todas as actuacións estean finalizadas entre finais de 2024 e o primeiro trimestre de 2025 para "unir definitivamente" dunha maneira "humanizada" Pontevedra e Marín.
