Renfe incrementa case nun 100% os viaxeiros en trens de proximidade, Media Distancia e Avant en Galicia
Por E.P. | MADRID | 03/04/2023 | Actualizada ás 14:22
Renfe incrementou en Galicia un 94,7% o número de viaxeiros transportados nos servizos de proximidade de Ancho Métrico, Media Distancia e Avant, respecto ao mesmo período do ano pasado en Galicia. Súmanse 473.000 novos desprazamentos para alcanzar a cifra total 973.073 clientes nos servizos públicos da compañía.
Este crecemento coincide coa implementación dos abonos gratuítos para viaxeiros frecuentes en Proximidades e Media Distancia, así como a bonificación do 50% nos títulos multiviaxe dos servizos Avant.
Ademais, o número de viaxes no servizo Avant é o que máis creceu: transportouse a 128.117 persoas máis que o ano pasado, o que supón un incremento do 131%. En total, desprazáronse 226.130 viaxeiros na conexión A Coruña - Ourense - Santiago e nos novos servizos entre Galicia e Castela e León.
No conxunto do Estado, a compañía de transportes aumentou 35,9% o número de viaxeiros transportados nestes mesmos servizos, o que lle permitiu alcanzar o total de 74,2 millóns de clientes nos servizos públicos de Renfe, 19 millóns máis que hai un ano.
