A Xunta convoca unha nova edición dos Premios Extraordinarios de Bacharelato

A Xunta de Galicia convocou unha nova edición dos Premios Extraordinarios de Bacharelato, correspondentes ao curso 2022/23, un galardón que impulsa cada ano a Consellería de Cultura co obxectivo de recoñecer os méritos académicos dos alumnos desta etapa educativa.

Como se recolle no Diario Oficial de Galicia, poderán conseguir estes galardóns, dotados cada un deles con 1.000 euros, un total de 20 estudantes. O alumnado que obteña o premio extraordinario recibirá, ademais, un diploma acreditativo e a distinción será anotada no seu expediente académico.

O obxectivo é recoñecer e valorar publicamente os méritos excepcionais baseados no esforzo e no traballo das persoas que cursaron cun excelente resultado académico estes ensinos.

Poderá optar ao Premio Extraordinario de Bacharelato o alumnado que terminase estes estudos no curso 2022/23 nun centro docente de Galicia, ben na modalidade presencial ou na modalidade a distancia e que obtivese unha nota media igual ou superior a 8,75 puntos. Ademais, os candidatos deberán realizar unha proba presencial, que terá lugar o día 14 de xuño, e que está estruturada en dous partes.

A primeira delas consistirá nunha análise e comentario crítico dun texto sobre un tema de carácter xeral, histórico, filosófico ou literario, e en responder cuestións de carácter cultural ou lingüístico sobre un texto na Primeira Lingua Estranxeira II cursada polo alumnado como materia xeral do bloque de materias troncais do Bacharelato.

A segunda parte consistirá no desenvolvemento de temas, respostas a cuestións ou exercicios prácticos dunha materia xeral do bloque de materias troncais cursada polo alumnado a elixir entre Matemáticas II, Matemáticas Aplicadas ás Ciencias Sociais II, Latín II e Fundamentos da arte II.