Ames Novo non concorrerá ás municipais de maio e tratará de construír unha alternativa para 2027

Ames novo acordou non concorrer ás próximas eleccións municipais nesta localidade coruñesa ante a "falta dunha alternativa unitaria genuinamente municipalista no espazo progresista" pero tratará de construír unha alternativa para os comicios de 2027.

Diso informou a organización nun comunicado, no que explicou que non se disolverá, senón que continuará presente na política local "desde a base" para traballar na construción dunha alternativa cidadá con capacidade de gobernar no horizonte de 2027.

Alternativa Cidadá Ames Novo asegurou que recibiu ata catro propostas nos últimos meses, pero sinalou que decidiu rexeitalas por diferentes motivos e non presentar listas nas próximas municipais do 28 de maio para evitar contribuír a unha maior fragmentación do voto da esquerda.

Así, a formación apuntou que a proposta tiñan como denominador común a elaboración de listas electorais con posibilidades de obter unha maior representación no pleno, pero "non partían da asunción dos principios de asamblearismo e construción dunha alternativa desde a base".

Ademais, a organización fixo un balance positivo da súa participación nos órganos do Concello nos dous últimos mandatos. Así, indica que no período de 2015-2019, o seu catro representantes foron determinantes nun pleno no que o goberno (formado por nove de 21 edís) non tiña maioría para sacar adiante as cuestións sen acordalas previamente con Ames Novos.

Tamén sinalou que, no último mandato (2019-2023), o representante de Ames Novo no Concello mantivo a política de apoio crítico ao goberno progresista, no "intento de profundar nas políticas a favor da maioría social e conseguindo a introdución de modificacións nese sentido nos diferentes orzamentos".

Ames Novo destacou que traballará para "reorganizar o espazo común da cidadanía progresista que, prescindindo de siglas, queira traballar a favor dun Ames máis centrado na xente". Por iso, a súa vontade é reiniciar no novo curso político, e unha vez superadas as municipais e xerais, un proceso de confluencia das persoas con vocación de goberno cara aos seguintes comicios municipais.

Por último, os membros da formación non fixeron recomendación de voto por ningunha das opcións que concorren ás locais o próximo 28 de maio, pero si chama á cidadanía progresista a utilizar o seu voto de forma que Ames poida seguir contando cun goberno de progreso fronte ás alternativas "involucionistas" que, segundo sinalou, representan as dúas candidaturas da extrema dereita (UCIM e Vox), así como a alternativa conservadora do PP.

Papeletas, urnas, sobres, eleccións, municipais, autonómicas, europeas.. EUROPA PRESS - Arquivo