Investigadores da USC participan nun programa internacional para o control das biotoxinas
O obxectivo xeral de 'BIOTOXDoc', iniciativa na que participan máis dunha ducia de entidades europeas, pasa por formar doutores e especializalos para avanzar no control das biotoxinas.
Por E.P. | SANTIAGO DE COMPOSTELA | 19/04/2023 | Actualizada ás 19:28
Un grupo de investigadores da Universidade de Santiago, coordinado polo catedrático da área de Farmacoloxía na Facultade de Veterinaria do Campus Terra, Luís Miguel Botana, participa nun programa internacional que trata de profundar no coñecemento que se ten sobre a toxicidade das toxinas.
O obxectivo xeral de 'BIOTOXDoc', iniciativa na que participan máis dunha ducia de entidades europeas, pasa por formar doutores e especializalos nunha ampla gama de especialidades para avanzar no control das biotoxinas. Segundo detallou este mércores a USC nun comunicado, a liña aberta polo grupo que dirixe Luís M. Botana sobre a toxicidade das toxinas está considerada como unha oportunidade para avanzar no ámbito da seguridade alimentaria a nivel mundial.
O profesor da universidade compostelá considera que a problemática das biotoxinas e, especialmente, das toxinas mariñas, require de solucións urxentes. O catedrático pon o foco na falta investigadores especialistas en seguridade alimentaria e cuestiona "a eficacia e a precisión das diferentes normativas vixentes" para garantir a produción e a subministración de alimentos seguros no mundo nun contexto de cambio climático.
Así pois, os investigadores do doutoramento que forman parte do proxecto 'BIOTOXDoc' desenvolverán novas estratexias de desintoxicación de biotoxinas e avaliarán a toxicidade combinada de biotoxinas coexistentes, á vez que realizarán probas rápidas e de confirmación de biotoxinas.
