A CGT denuncia irregularidades nunhas oposicións para favorecer o candidato do PP á Alcaldía de Ponte Caldelas

O secretario xeral de CGT, Miguel Ángel Cuña, saíu este luns en defensa de Cristina Villaverde, unha traballadora que ocupa o posto da convocatoria desde hai 23 anos como persoal laboral.

Por E.P. | SANTIAGO DE COMPOSTELA | 24/04/2023 | Actualizada ás 15:59

Comparte esta noticia

O sindicato CGT denuncia irregularidades na oposición para cubrir a praza de auxiliar bibliotecario na Lama para favorecer ao candidato do PP en Ponte Caldelas, Antón Gil, e que é responsable de prensa e de xestión de redes sociais no Concello da Lama, ademais de ser o director da radio municipal 'Radio Nova'.

O secretario xeral de CGT, Miguel Ángel Cuña, saíu este luns en defensa de Cristina Villaverde, unha traballadora que ocupa ese posto desde hai 23 anos como persoal laboral e que xa presentou un recurso de alzada contra este "atropelo intolerable". Actualmente está de baixa pola presión á que está a ser sometida nos últimos meses, segundo explicou a afectada.

Denuncia esta traballadora que o alcalde da Lama, Jorge Canda, do PP, quere deixar colocado ao seu asesor antes das próximas eleccións municipais. A cinco días de que a Lei dos Interinos de 2021 entrase en vigor, o goberno local convocou a oposición para esa praza e para iso constituíuse un tribunal con maioría de representantes dos concellos do PP: dous funcionarios municipais de Cerdedo-Cotobade e un do de Campo Lameiro, para os que traballa tamén Antón Gil, como responsable de comunicación.

Gil recibiu a nota máis alta no primeiro exame, cun 7,80, a pesar de non ter titulación específica ou de experiencia profesional algunha relacionada directamente coa praza de auxiliar bibliotecario e informador xuvenil. Villaverde quedou cun 5,6 de nota e o resto de aspirantes suspenderon.

Cristina Villaverde asegura que "foi un exercicio moi viciado", posto que o exame non se atopaba en sobre lacrado, as preguntas eran "confusas" e o presidente do tribunal impediu, a pesar da protesta dalgún outro opositor, que se puidesen levar copias dos exames ou extraer algún papel da sala ao terminar a proba.

Villaverde está a estudar coa súa avogada recorrer á xustiza para denunciar estes feitos: "Non estou disposta a tolerar ningún atropelo á miña profesionalidade e dignidade, nin a tolerar prácticas caciquiis e discriminatorias co dereito ao traballo". A proba práctica está prevista para o 2 de maio.

Miguel Anxo Cuña, secretario xeral de CXT Pontevedra, cualificou estes feitos como unha "cacicada inmensa" e un "despropósito" que ameaza coa perda dun posto laboral dunha traballadora "sen xustificación", alegando as numerosas irregularidades neste proceso selectivo.

Oposicións no Recinto Feiral de Silleda. XUNTA DE GALICIA
Oposicións no Recinto Feiral de Silleda. XUNTA DE GALICIA

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta