Chega ao seu fin a serie documental da RAG dedicada a Francisco Fernández del Riego
Por E.P. | SANTIAGO DE COMPOSTELA | 25/04/2023 | Actualizada ás 20:20
A Real Academia Galega (RAG) estreou este martes o sexto e último episodio de 'Francisco Fernández del Riego, o que nunca se rendeu', a serie documental que lle dedica ao creador do Día das Letras Galegas e homenaxeado neste 60 aniversario da conmemoración da data. Complétanse así 90 minutos de cinema documental na rede que mostra os seus diversos perfís e percorre a súa vida desde o seu nacemento en 1913 ata o seu falecemento en 2010.
Esta última entrega, que se pode ver en Youtube e na páxina web da RAG, detense na produción literaria de "un gran cultivador da divulgación e do xornalismo de opinión" que, destaca a RAG, "deixou tamén dous grandes libros sobre distintas personalidades das nosas letras", dúas de memorias --'O río do tempo' e 'Camiño andado'--, diversos volumes nos que plasmou a súa paixón polas viaxes e unha única novela, 'O cego de Pumardedón', "que bebe da experiencia da guerra civil".
'Francisco Fernández del Riego, o que nunca se rendeu' é unha serie da RAG realizada por "un equipo de xente nova". A limiá Belén Rivero asina o guión e o lucense Damián Varela, a dirección do documental, que levou a cabo co apoio económico da Xunta e do Ministerio de Ciencia e Innovación.
"Ao longo dos seis episodios coñecemos a un Francisco Fernández del Riego que non deixa de sorprendernos pola súa capacidade de actuar en todos os ámbitos posibles para facer da súa idea de Galicia unha realidade", subliñou Belén Rivero.
