A Xunta autoriza 75 parques eólicos, o 63% dos que completaron a tramitación da DIA

Denegouse a autorización dun parque e obrigouse en 24 casos a que os promotores reducisen a potencia

Por Europa Press / Redacción | SANTIAGO DE COMPOSTELA | 26/04/2023 | Actualizada ás 17:38

Comparte esta noticia

O vicepresidente segundo e conselleiro de Economía, Empresa e Innovación, Francisco Conde, confirmou este mércores que a Xunta autorizou 75 parques eólicos, o 63 por cento dos que completaron a tramitación.

Así, en resposta a unha interpelación formulada pola deputada do BNG Noa Presas sobre a participación pública da Administración autonómica no ámbito eólico; Conde aproveitou para avanzar estes datos tras o peche do prazo en días pasados e concretou que se corresponden con 1.958 megawatts.

Desta maneira, convértese na primeira comunidade autónoma que o logra para os proxectos vinculados ao fito do 25 de xaneiro, de tramitación da DIA --declaración de impacto ambiental--.

Ademais, tras avaliar en detalle os proxectos que obtiveron a DIA, denegouse a autorización dun parque e obrigouse en 24 casos a que os promotores reducisen a potencia con respecto ao proxecto inicial para axustarse aos requirimentos técnicos, ambientais e patrimoniais necesarios.

Tendo en conta que 43 parques obtiveron DIA negativa en xaneiro, dos 119 parques para os que se completou a tramitación, seguen adiante o 63 por cento. Ademais, segundo explicou Conde, a Administración autonómica está a esixir unha avaliación ambiental ordinaria, a "máis rigorosa" para conseguir unha DIA, con participación pública e que ten en conta o estudo de sinerxías para avaliar os parques máis próximos e as infraestruturas de evacuación.

DEBATE

Durante o debate, o vicepresidente segundo botou en cara ao BNG que "fale do pasado, critique o presente e non expoña ningún tipo de proposta" para o futuro, á vez que lles acusou "querer de implantar un retroceso", "negando" industria renovable e enerxía competitiva e verde.

Ademais, Conde acusoulles de estar detrás da "pancarta" e instou ao BNG a preguntarse cal é a súa proposta para "alcanzar o cero emisións netas en 2050". Deste xeito, reprobou que o BNG di "non" a "todo o que significa progreso".

A deputada nacionalista advertiu de que "non se está reinvestindo" os beneficios das empresas eólicas en Galicia e por iso é polo que a proposta do BNG sexa unha empresa de participación pública, unha sociedade mercantil, encabezada pola Xunta e aberta a entidades locais.

Fronte ás palabras de Conde, a deputada do Bloque lembroulle que é preciso falar do pasado porque del deriva o presente e pediulle que explique se "recoñece que foi un erro vetar a participación pública no sector eólico".

Este debate prodúcese tres días despois de que un dous mil persoas rodeasen a sede da Xunta en Santiago de Compostela para reclamar a paralización da aprobación dos 77 proxectos eólicos que xa recibiran a declaración de impacto ambiental positiva. O prazo límite para conseguir a autorización previa administrativa do Goberno galego era este pasado martes. Finalmente, segundo os datos de Conde, 75 parques conseguírono.

Varias vacas pastan xunto a un aeroxerador eólico no Parque eólico de Montouto, da Serra do Xistral
Varias vacas pastan xunto a un aeroxerador eólico no Parque eólico de Montouto, da Serra do Xistral | Fonte: Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta