A Xunta avanza que incrementará o número de ambulancias do 061 no próximo concurso de transporte urxente
A isto suman que se buscará reforzar a liña de cardioprotección das zonas rurais
Por E.P. | SANTIAGO DE COMPOSTELA | 26/04/2023 | Actualizada ás 19:00
O conselleiro de Sanidade, Julio García Comesaña, avanzou este mércores que a licitación do novo concurso de transporte sanitario terrestre pretende consolidar o proxecto iniciado no ano 2019.
En resposta a unha pregunta formulada polo grupo popular durante o Pleno do Parlamento, Comesaña lembrou que o servizo a disposición do 061 co contrato vixente conta con 15 ambulancias máis das que existían no ano 2008, o que incrementou as mobilizacións anuais dos recursos preto dun 25% respecto dese ano.
En consecuencia, o responsable de Sanidade asegurou que a Xunta formulará a licitación do novo contrato "buscando dar continuidade a un modelo que está a dar bos resultados no seu obxectivo, que é asegurar a accesibilidade, equidade, eficiencia e sustentabilidade de unaasistencia urxente de máxima calidade ao conxunto da poboación".
Apuntou ademais que a licitación do novo concurso pretende adaptarse a "unha nova situación económica que require dun incremento dos fondos, xa que o contrato xa experimentará unha importante subida ao contemplar un incremento dos salarios do persoal do 4%, equivalente ao que experimentaron os empregados públicos". Tal e como explicou, os aumentos do mapa de recursos virarán ao redor da consolidación de dúas liñas de traballo, iniciadas no concurso de 2019.
A primeira será estender o modelo de ambulancias de soporte vital avanzado de enfermaría, agora presentes na Coruña, Vigo, Santiago e Pontevedra. Agora, consideran, é o momento de achegar estas ambulancias a outras poboacións semiurbanas con extensa área de cobertura e longas distancias ao hospital de referencia, como Lalín, "cunha gran dispersión poboacional e distancias ao hospital de referencia superiores aos 50 kms".
A isto suman que se buscará reforzar a liña de cardioprotección das zonas rurais que funcionou en zonas como Pedrafita ou Folgoso do Courel. A este respecto, o novo concurso proporá localizar unha ambulancia convencional con base no municipio ourensán da Veiga e zona de cobertura preferente no mesmo municipio, que conte cun desfibrilador externo semiautomático e un técnico en emerxencias sanitarias con formación no uso do mesmo.
Por último, o conselleiro aproveitou para lembrar a autorización por parte do Consello da Xunta este mes dun novo contrato de transporte sanitario urxente aéreo por valor de case 10 millóns de euros. Este contrato ampliará as horas dun servizo de helicópteros sanitarios que realiza agora "o dobre de saídas das que realizaba en 2008".
