Alertan do aumento dun 38% das mortes no traballo en Galicia, con 12 só nos dous primeiros meses do 2023
Así o conclúe un estudo de UXT, que urxe medidas e pide que se inclúa o covid como enfermidade profesional
Por Europa Press / Redacción | SANTIAGO DE COMPOSTELA | 27/04/2023 | Actualizada ás 13:47
UXT alertou do aumento de falecementos nos casos de sinistralidade laboral en Galicia, case o 38% no último ano, segundo apunta coincidindo coa conmemoración este venres, día 28, do Día Mundial da Seguridade e a Saúde no Traballo. Ademais, indica que son 12 as mortes nos dous primeiros meses de 2023.
Por todo iso, urxe "medidas reais e efectivas para pór freo a esta secuela" e remarca que cos casos rexistrados en xaneiro e febreiro Galicia sitúase como "a segunda comunidade con máis persoas falecidas", igualada con Cataluña e Valencia. "E co segundo índice de incidente de sinistros mortais tamén máis elevado", apostila.
Respecto diso, indica que no ano 2022 rexistráronse na comunidade autónoma galega, segundo os datos publicados polo Ministerio de Traballo e Economía Social, 28.401 accidentes laborais,o que supón un leve descenso, dun 1,9 por cento, en relación ao ano anterior, cando se contabilizaban 28.976 accidentes.
Deste total, 27.891 foron accidentes de carácter leve, 437 graves e 73 mortais. Por sección de actividade económica, as que máis accidentes rexistran son a industria manufactureira, 6.078;seguida da construción, con 4.125; 3.181 no comercio por xunto e menor e reparación de vehículos a motor; e actividades administrativas e servizos auxiliar, con 2.458.
Territorialmente, é a provincia da Coruña a que máis accidentes rexistrou, 12.609 e con 22 mortais. Pontevedra contabilizño 9.360, con 39 mortais; Lugo, 3.196, con sete falecidos; e Ourense, 3.236, con cinco persoas mortas durante a súa xornada laboral.
"Infartos e outras patoloxías non traumáticas son as causas que ocasionan máis accidentes mortais", explica. Por todo, iso insiste en que "urxen medidas que reduzan os riscos psicosociais xa que tanto os infartos como os derrames cerebrais son patoloxías asociadas a riscos laborais". Por outra banda, pide incluír o coronavirus na listaxe de enfermidades profesionais e atender no campo laboral á covid persistente.
