A Xunta avalará o 20% do prezo da vivenda de mozos galegos

Asina un convenio con Abanca e Caixa rural Galega para a concesión de hipotecas para primeiras vivendas.

Por E.P. | VIGO | 28/04/2023 | Actualizada ás 13:49

Comparte esta noticia

O presidente da Xunta, Alfonso Rueda, asinou este venres un convenio coas entidades financeiras Abanca e Caixa Rural Galega para a concesión de avais vinculados a préstamos hipotecarios co obxectivo de permitir aos mozos galegos acceder á súa primeira vivenda.

En concreto, esta iniciativa pretende avalar o 20% do prezo de adquisición do domicilio, unha cantidade que o comprador ten que achegar porque non se inclúe na hipoteca e que, en moitos casos, os mozos non dispoñen de dita liquidez.

Acompañado pola conselleira de Medio Ambiente, Territorio e Vivenda, Ángeles Vázuqez, Rueda lembrou que o programa 'Avais para a mocidade' forma parte do Pacto de Vivenda de Galicia 2021-2025 coa intención de paliar as dificultades que teñen os máis novos para acceder a unha vivenda en propiedade, xa que non dispoñen de aforros para adiantar a entrada.

"Moitas veces é precisamente ese 20% que falta, e que non se inclúe no acordo da hipoteca, o que impide asinala", lamentou o mandatario autonómico, polo que subliñou que todos aqueles que se atopen nesa situación xa poderán negociar a hipoteca coas entidades financeiras coas que a Xunta asinou o convenio a partir deste venres e ata o 30 de novembro.

Estes avais contan cun orzamento inicial de 5 millóns de euros e van dirixidos a mozos de menos de 36 anos, dando cobertura ao 20% da hipoteca que non cobre a entidade bancaria. Para Rueda, esta medida busca dar resposta a unha "demanda real", reivindicando que nas primeiras horas desde a súa publicación esta mañá xa se recibiron "ao redor de 20 ou 30 peticións".

Rueda no momento da firma dun convenio de hipotecas para xente moza
Rueda no momento da firma dun convenio de hipotecas para xente moza | Fonte: PEDRO DAVILA-EUROPA PRESS

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta