Abre a Feira do Libro de Santiago durante nove días con 100 autores e 50 citas culturais
A Feira do Libro de Santiago está instalada na Alameda ata o 7 de maio e reunirá a 126 autores nos nove días de feira, cunha media dunha quincena de autores por día.
Por E.P. | SANTIAGO DE COMPOSTELA | 29/04/2023 | Actualizada ás 17:56
A Feira do Libro de Santiago arrincou este sábado, día 29 de maio, con 11 librarías participantes, preto dun centenar de autores, máis de 50 citas culturais e lúdicas e un pregón a cargo do poeta e escritor Ismael Ramos.
Na inauguración desta feira, que é a segunda parada do circuíto que este ano chegará a 14 localidades galegas froito da colaboración da Xunta e a Federación de Librarías de Galicia, participou o conselleiro de Cultura, Educación, FP e Universidades, Román Rodríguez, quen animou a "comprar libros e gozar da lectura" a través dunha cita que permitirá "atraer ao maior número posible de afeccionados á lectura, tanto lectores ávidos como esporádicos".
Román Rodríguez puxo en valor, ademais, o labor dos libreiros e editores por levar a cabo ano a ano estas feiras por toda a xeografía galega, contribuíndo, dixo, a impulsar os hábitos lectores de Galicia.
Ademais, conforme sinalou a Xunta nun comunicado, referiuse ao sector do libro como "un dos alicerces da cultura galega", que conta cunha nova folla de ruta en marcha, o Plan de impulso ao libro galego que o Consello da Xunta aprobou este mes con 3 millóns con medidas dirixidas á creación, impulso á edición e distribución, proxección exterior, difusión e apoio a bibliotecas públicas.
O conselleiro tamén se referiu, ademais, á posta en marcha da campaña institucional lanzada pola Xunta que, baixo a lema 'Todo é posible cando nos peñomos a ler', está presente durante todo este ano para fomentar entre toda a cidadanía a que, sexa cal for a súa motivación, aposten por comprar e gozar dos libros coa intención de fidelizar lectores e gañar outros novos.
ONCE EXPOSITORES
A Feira do Libro de Santiago está instalada na Alameda ata o 7 de maio e reunirá a 126 autores no nove días de feira, cunha media dunha quincena de autores por día, con actividades como firmas de libros, presentacións ou talleres.
En concreto, están previstas 75 firmas, cinco actividades para público infantil, 17 presentacións de novidades, seis charlas, así como iniciativas lúdicas e musicais. Consta de 11 expositores coa presenza de dous editoriais (Boadicea Editora e Editorial Galaxia) e nove librarías (Pedreira, Cortizas, O faro do tres mundos, Agrasar, A Gata Tola, Aenea, Ler Librarías, Ben e Cartabón).
O evento chega a Santiago tras o seu paso por Ferrol. O calendario continuará ata agosto de forma que, tras Compostela, a próxima cita será no Porriño (do 11 ao 14 de maio) e Lugo (do 16 ao 20 de maio).Posteriormente haberá paradas en Vilalba (do 2 ao 4 de xuño), Ourense (do 7 ao 10 de xuño), Redondela (do 15 ao 18 de xuño), Vigo (do 23 ao 29 de xuño, Ponteareas (do 13 ao 16 de xullo) e Rianxo (do 22 ao 25 de xullo). Xa en agosto o circuíto chegará A Coruña (do 1 ao 10), Viveiro (do 12 ao 15), Foz (do 17 ao 20) e Monforte de Lemos (do 23 ao 26).
