Un xulgado declara válidas as eleccións sindicais en Conservas do Noroeste

As eleccións sindicais celebradas en Conservas do Noroeste foron declaradas válidas, segundo informa o sindicato CCOO en base a un fallo xudicial que, subliña, "considera que a empresa tivo unha intervención inaceptable no proceso electoral".

Radicada en Vilaboa (Pontevedra) e a décima empresa conserveira de España por volume de facturación, na mesma convocáronse eleccións para a designación dun comité de empresa de nove membros, "despois dun período de tempo sen que na empresa existese representación unitaria dos traballadores".

"Desde o primeiro momento o proceso electoral viuse obstaculizado pola intervención da dirección da empresa, ata o punto que promoveu a presentación de candidatura 'independente' no colexio de técnicos", explica.

CCOO impugnou o proceso ao entender que non cumpría os requisitos legais e o laudo arbitral deulles a razón anulando as mesmas. Finalmente, este sindicato obtivo sete representantes aínda que a candidatura independente presentou recurso. Agora, un fallo, remarca o sindicato, declara válidas as eleccións.

Fábrica de Conservas do Noroeste | Fonte: Consorma