Bertelsmann cotrata a Pablo Illa pola súa "personalidade emprendedora extremadamente exitosa"
Incorpora ao ex conselleiro delegado ao seu consello de supervisión.
Por Europa Press / Redacción | Santiago de Compostela | 08/05/2023 | Actualizada ás 16:18
O xigante alemán dos medios de comunicación Bertelsmann confirmou este luns a incorporación do español Pablo Isla como novo membro do consello de supervisión da multinacional a partir do 1 de abril de 2024, despois da aprobación do nomeamento na súa xunta xeral de accionistas.
"Pablo Isla é unha personalidade emprendedora extremadamente exitosa", destacou Christoph Mohn, presidente do consello de supervisión de Bertelsmann, lembrando que, baixo o liderado do español, Inditex protagonizou "unha impresionante historia de crecemento internacional" ao mesmo tempo que introduciu altos estándares ecolóxicos para os seus produtos.
"Pablo Isla demostrou que o éxito e a responsabilidade van da man para un emprendedor", destacou. Isla, que preside o Consello Asesor Internacional de IE University Madrid desde 2022, ademais de ser asesor senior de General Atlantic e membro do consello de administración de Nestlé, dirixiu Industria de Deseño Téxtil (Inditex) entre 2005 e 2022, primeiro como conselleiro delegado e logo como presidente e conselleiro delegado desde 2011.
Con anterioridade, o executivo desempeñou de 2000 a 2005 a copresidencia executiva de Altadis, ademais de ocupar destacados cargos directivos en Banco Popular.
Bertelsmann é unha empresa de medios, servizos e educación que opera nuns 50 países de todo o mundo con ao redor de 165.000 empregados e inclúe entre outras empresas como RTL Group, a editorial Penguin Random House, a compañía de música BMG ou o provedor de servizos Arvato Group. No exercicio 2022, a alemá xerou uns ingresos de 20.200 millóns de euros.
