O Goberno modifica a concesión da AP-9 para melloras en túneles, pero sen cambios en peaxes nin duración
A actuación inclúe combater a contaminación acústica na contorna de Pontevedra.
Por E.P. | SANTIAGO DE COMPOSTELA | 06/06/2023 | Actualizada ás 14:29
O Consello de Ministros aprobou a modificación da concesión da autoestrada AP-9 para mellorar os túneles, a eficiencia enerxética e desenvolver actuacións contra a contaminación acústica. Con todo, este cambio non afectará as contías das peaxes nin á duración concesional.
O Consello de Ministros, na súa reunión deste martes e a proposta do Ministerio de Transportes (Mitma), aprobou un decreto para estas actuacións, do mesmo xeito que realiza con outro similar para a concesión da autoestrada AP-66 (Campomanes-León). Deste xeito, as sociedades concesionarias encargaranse da redacción dos proxectos e o mantemento. Pola súa banda, o Mitma executará as obras.
"Trátase dunha modificación concesional que non leva ningún cambio nin na contía das peaxes nin na duración da concesión, e está encamiñada a mellorar a sustentabilidade e a seguridade das citadas autoestradas", asegura o Goberno. A actuación inclúe combater a contaminación acústica na contorna de Pontevedra, conforme ao previsto no Plan de Acción contra o Ruído Fase II de Mitma.
Así mesmo, cada parte asumirá os custos que resulten necesarios para cumprir as súas obrigacións. Para iso, no que concerne ao Mitma, prevese que as actuacións se financien preferentemente a través do Plan de Recuperación, Transformación e Resiliencia.
