O filme 'Os demos de barro', no que traballou a TVG, gaña o premio á mellor película de animación no Celtic Media
A destrución da natureza, a vida moderna, o abandono do campo ou a superficialidade das relacións humanas son algúns dos temas que aborda esta película.
Por Europa Press / Redacción | SANTIAGO DE COMPOSTELA | 06/06/2023 | Actualizada ás 19:56
A longametraxe 'Os demos de barro', na que participa a TVG, venceu na categoría de mellor película de animación nos galardóns que se entregan no Celtic Media Media Festival 2023, que celebra a súa 44ª edición na localidade irlandesa de Dungloe.
Dirixida polo cineasta portugués Nuno Beato, 'Os demos de barro' é unha coprodución hispano-franco-portuguesa que combina a técnica de 'stop-motion' con animación en 2D e á que pon as súas voces os intérpretes galegos Isabel Naveira, Monti Castiñeiras, Ledicia Soa e Celso Bugallo, segundo trasladou o ente público.
A cinta, inspirada visualmente na cerámica tradicional lusa, conta a historia de Rosa e o seu regreso ás raíces cunha volta á súa aldea natal. A destrución da natureza, a vida moderna, o abandono do campo ou a superficialidade das relacións humanas son algúns dos temas que aborda esta película coproducida por Sardinha em Lata (Portugal), Caretos Films A.I.E. (Galicia), Basque Films (País Vasco) e Midralgar (Francia).
