O sector eólico mete presión e avisa de que a electrificación da economía "non vai ao ritmo"
Sinalanse os "altos prezos" como o motivo do retroceso.
Por Europa Press / Redacción | Santiago de Compostela | 29/06/2023 | Actualizada ás 18:21
O sector eólico advertiu de que a electrificación da economía "non está a avanzar ao ritmo necesario" para que poida acompañar aos obxectivos de renovables que marca o novo Plan Nacional Integrado de Enerxía e Clima (PNIEC) a 2030.
No seu discurso na inauguración do Congreso Eólico Anual, o presidente da Asociación Empresarial Eólica, Juan Diego Díaz, puxo sobre a mesa este risco e asegurou que o desenvolvemento das renovables debe "ser obrigatoriamente soportado por unha demanda eléctrica acorde, en dimensión e prazos". En concreto, o borrador de actualización do PNIEC do Goberno aspira a 105 xigavatios (GW) de renovables novas na década. Así, para o ano 2030 espérase alcanzar os 62 xigavatios (GW) de eólica instalados.
Así, sinalou que a demanda eléctrica esborrallouse nestes últimos anos, situándose nuns niveis similares a 2020, en plena pandemia, ou aos de hai dúas décadas. Neste sentido, recoñeceu que é verdade que se produciu unha mellora en eficiencia enerxética que pode trasladarse a esa caída, pero vinculou este retroceso na demanda eléctrica ao descenso no ámbito, principalmente, industrial, "polos altos prezos".
Por iso, alertou de que o ritmo de crecemento da demanda eléctrica "non está a dar os sinais suficientes" para absorber todos eses proxectos renovables que se prevén desenvolver, polo que estimou que ao final "serán financiables ou suporá unha perdida de valor dos activos existentes".
No entanto, Díaz aplaudiu os obxectivos "máis ambiciosos" apuntados na actualización do PNIEC, que recollen así as peticións que viña realizando o sector de elevar as metas, aínda que apuntou a necesidade de "axilizar" a tramitación de proxectos. A este respecto, afirmou que a prórroga de seis meses dada polo Goberno para obter a autorización de construción dos proxectos renovables supón "un alivio".
Ademais, apuntou que a industria eólica europea, a pesar de estar a vivir "complicados momentos" pola subida das materias primas e a inflación, debe seguir "deseñando e fabricando" aeroxeradores e os seus compoñentes en Europa, "con estruturas de custo europeas para seguir liderando a eólica mundial".
