O PP galego reúne a deputados e senadores antes da investidura de Feijóo: "non permitirán" que "se dea a uns para quitar a outros"

O PP galego reuniu este venres aos seus deputados e senadores ás portas da sesión de investidura do seu líder de filas, Alberto Núñez Feijóo, a quen reivindican como "gañador" das eleccións do pasado 23 de xullo pero que chega ao martes sen os apoios necesarios para alcanzar a maioría que o leve á Moncloa.

Nun hotel de Santiago e coa secretaria xeral, Paula Prado, á cabeza, os representantes do PP de Galicia nas Cortes do Estado comprometéronse a "defender os intereses" de "todos" os galegos durante esta lexislatura e advirten que "non permitirán" que "se lle dea a uns para quitar a outros", en alusión ás negociacións do PSOE coas forzas independentistas de face á investidura de Pedro Sánchez.

"Pagarlle a (Carles) Puigdemont os 450.000 millóns de euros que pide por investir a Sánchez supón que unha comunidade terá medio billón máis á conta de que outras 16 teñan medio billón menos", sinala o PP nun comunicado remitido aos medios tras o almorzo dos seus deputados e senadores en Madrid, onde prometen "dar a batalla" en cuestións que afectan a Galicia como a transferencia da AP-9, o estado das súas infraestruturas ou a repartición de fondos europeos. 

Os populares reivindican que teñen 27 representantes nas Cortes Xerais polos "15 de toda a esquerda" e subliñan o seu compromiso con "defender a igualdade de todos os españois e o trato xusto" que, din, "merece" Galicia.