Complétase a renovación do equipamento do Laboratorio de Saúde Pública de Galicia

A Xunta adxudicou este mes o último contrato do proceso de renovación e modernización tecnolóxica do Laboratorio de Saúde Pública de Galicia (LSPG): un cromatógrafo iónico para a determinación de sulfitos. Con esta última adxudicación, complétase un investimento total de case 1,5 millóns de euros no Laboratorio de Saúde Pública de Galicia, financiado con Fondos europeos no marco do eixo REACT-UE do programa operativo FEDER GALICIA 2014-2020 como parte da resposta da UE á pandemia da covid-19.

A Xunta de Galicia decidiu facer uso destes fondos europeos para renovar o equipamento e o sistema de información e xestión do laboratorio. Apostouse, por tanto, por dedicar estes fondos de recuperación tras a pandemia a potenciar precisamente a capacidade de prevención e control no campo da saúde pública, con investimentos que van permitir "multiplicar a capacidade analítica do LSPG para detectar novos patógenos e contaminantes de interese nos alimentos e augas de consumo", explicou a Xunta.

Así, a área de Microbiología dotouse dun novo termociclador e dun extractor de ácidos nucleicos que, a curto prazo, permitirán que o Laboratorio de Saúde Pública de Galicia poida engadir ao seu catálogo de servizos a análise de varios patógenos en augas e alimentos. Por outra banda, na área de Química incorporáronse un novo equipo de cromatografía de líquidos dotado cun detector de espectrometría de masas de tripo cuadrupolo e outro de cromatografía de gases, xunto cun sistema cromatográfico UHPLC con dobre detector e un equipo de espectometría de masas con plasma de axuste indutivo. Para completar a renovación e modernización do equipamento, adxudícase agora un cromatógrafo iónico para a determinación de sulfitos.

Laboratorio de Saúde Pública de Galicia./ XUNTA / Europa Press