Por Galicia Confidencial | Ferrol | 04/11/2015 | Actualizada ás 13:44
A delegación da Coruña da Consellería de Política Social descoñece a causa e asegura que non hai risco de máis contaxios, pero o certo é que nove internos do CEE Souto de Leixa , situado en Ferrol, teñen a sarna, polo que están illados.
A escabiose ou sarna é unha enfermidade da pel causada por un ácaro parasito, chamado comunmente arador da sarna. Extremadamente contaxiosa, o principal síntoma é o proído, que aumenta o seu efecto durante as noites e coa calor. As lesións máis típicas son os sucos, liñas grisáceas e sinuosas de 1 a 15 mm de longo, que son o reflexo exterior da galería escavada na epiderme pola femia co fin de desovar, e as vesículas perladas, do grosor dunha cabeza de alfinete, producidas pola secreción do parasito.
O Goberno Galego confirma que a plaga detectouse o pasado martes, pero non trascendeu até hoxe. Todos os doentes, pero tamén as persoas que os coidaron estes días están aillados, di a Xunta que por precaución. A Administración tamén informa que todos os afectados están baixo tratamento e que evolucionan ben.
Esta mala noticia salta só catro días despois de que os pais dos internos protestaran ao conselleiro ante a precariedade e os recortes no centro. José Manuel Rey reuniuse con eles o venres 30 e tivo que escoitar como os pais lle indicaban que non hai coidadores dabondo, hai carencias nas instalacións -por exemplo as persoas con cadeira de rodas están nunha planta superiro sen luz natural-, barreiras arquitectónicas, etc. No favor do ex-alcalde de Ferrol, os pais din que Rey foi o primeiro conselleiro que aceptou escoitar directamente as súas reinvidicacións
O Centro "Souto de Leixa" formaba parte do Centro de Educación Especial "Terra de Ferrol", que a Xunta dividiu e privatizou recentemente. No "Souto de Leixa" están os discapacitados maiores de 21 anos, no CEE Terra de Ferrol os menores.
En 2010 a Xunta sacou a concurso a "contratación da xestión, en réxime de concesión, de prazas de atención residencial e atención diúrna para persoas con discapacidade intelectual e/ou outras discapacidades asociadas, no centro de atención á discapacidade Souto de Leixa"". Adxudicouno por urxencia a CLECE por 5,9 millóns de euros máis IVE en decembro de 2010. CLECE é a empresa multiservicios de ACS, a construtora de Florentino Pérez, o presidente do Real Madrid.
Este outono o Pleno do Comité de Traballo e Benestar da Coruña, aprobou de forma unánime (cos votos de CIG,CCOO,UGT,CSIF e CUT) facer unha Resolución dirixida a todos os grupos no Parlamento para que o centro volva ao sistema pùblico. Os pais agradeceron publicamente o apoio dos sindicatos na loita por mellorar as condicións dos seus fillos.
O centro sufre conflitividade laboral dende a súa privatización. En xuño un grupo de delegados e delegadas da CIG concentráronse diante deste Centro de Educación Especial (CEE) , para protestar polas actitudes que a Xerencia da empresa está a ter coa delegada da central sindical no Comité. Unhas actitudes, denuncian, “totalmente discriminatorias e arbitrarias,e que están a traer graves consecuencias para a súa saúde e situación laboral no centrode traballo”. En 2010 os sindicatos denunciaron que "a Xunta incrementa os equipamentos do Souto de Leixa nas vésperas de entregar a súa xestión a Clece e executar 54 despedimentos".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.