Mariñeiros identificados e expulsados dun hotel onde interviña Feijóo en Madrid

Mariñeiros galegos do cerco foron este mércores identificados e expulsados dun céntrico hotel madrileño no que se atopaba o presidente da Xunta, Alberto Núñez Feijóo, participando nun acto político.

Segundo informan fontes da Asociación de Armadores do Cerco de Galicia (Acerga), os mariñeiros foron botados do hotel Eurobuilding, ao que acudiron con intención de protestar pola actual situación do sector  tras as cotas impostas por Bruxelas. No seu interior, Feijóo participaba nunha conferencia do Club Siglo XXI.

Os mariñeiros levaron cartaces nos que se podía ler “Feijóo traiciona a los gallegos...+ del 60% del pescado de Galicia, + de 100 barcos, + de 36.000 familias, + de 80 puertos afectados”. A pesar de que nun primeiro momento se pensou que había detidos, finalmente, todos os mariñeiros acudiron aos dous autobuses que os levaran a Madrid para participar no calendario de mobilizacións do sector a nivel estatal. Os mariñeiros seguen acampados fronte a sede da Xunta en San Caetano para protestar pola súa situación.