Por Galicia Confidencial | Lugo | 19/11/2015 | Actualizada ás 11:00
Ata 13 partidos ou coalicións pelexarán polos escanos en Galicia ás cámaras do Congreso e o Senado nas eleccións do próximo 20 de decembro, aínda que só nove presentarán candidaturas nas catro provincias galegas.
Destas formacións, as de esquerda son maioría. Un total de sete son da esquerda, próximas á esquerda ou máis alá da esquerda; o PSdeG, En Marea, Nós-Candidatura Galega, o Partido da Terra, Recortes Cero-Grupo Verde, Comunistas da Galiza e Ourense pola Esquerda. Pero só cinco deles se presentan en todas as provincias. Comunistas da Galiza só o fan en Pontevedra, A Coruña e Lugo e Ourense pola Esquerda na provincia ourensá.
Pola súa banda, no lado da dereita están catro partidos; PP, Ciudadanos, UpyD e Vox. As tres primeiras presentan lista en todas as provincias galegas, mentres que Vox só terá listas na provincia de Pontevedra.
A estes comicios tamén se presenta, como noutros procesos electorais, Pacma, un partido animalista que ten coma fin defender o dereito de todos os animais, o medio ambiente e a xustiza social.Terá candidaturas nas catro provincias. Tamén o fará SAIN, o partido da Solidaridade e Autoxestión Internacionalista de ideas humanistas e cristiás, pero só na provincia da Coruña.
En todo o Estado presentaranse 83 candidaturas, 42 ao Congreso e 41 ao Senado por un total de 13 forzas ou coalicións.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.