Por Galicia Confidencial | Lugo | 25/11/2015 | Actualizada ás 13:00
A alianza tácita que mantén o PP de Lugo co deputado expulsado do PSdeG, Manuel Martínez, e que socialistas e nacionalistas xa cualifican de tránsfuga, pode supoñer unha gran inestabilidade para a Deputación provincial de Lugo.
Martínez, que mantivo varios encontros coa líder provincial do PP, Elena Candia, antes de plenos importantes, xa sumou a súa papeleta ás dos deputados populares en votacións fundamentais; como foron o reparto de adicacións exclusivas ou, como o deste martes, que competencias do goberno provincial pasen a ser votadas no pleno. É dicir, que tanto o PP como Martínez poden vetar esas decisións para o funcionamento do ente provincial.
Pero esa pinza de populares e o suposto tránsfuga Martínez pode ir máis alá xa que poden pactar o presidente e os integrantes do consello de administración da Sociedade Urbanística Provincial (Suplusa), un ente que está a xestionar este ano máis de seis millóns de euros.
O goberno provincial acaba de convocar, a petición do Partido Popular, unha xunta xeral desa sociedade pública para o próximo 7 de decembro, unha reunión na que, previsiblemente, procederase á elección do novo consello de administración, dado que algúns dos membros da anterior directiva xa son deputados provinciais despois das últimas eleccións municipais.
O consello de administración está formado por nove membros, o presidente da Deputación e outro oito máis, entre os que ten que haber integrantes de todos os grupos políticos con representación na corporación provincial. Até agora, o Partido Popular, tiña dous membros no consello de administración e agarda aumentar, substancialmente, o seu número.
Martínez quere máis medios na deputación
Por outra banda, o suposto deputado tránsfuga Manuel Martínez, quere ter condicións máis ventaxosas das que xa ten como deputado non adscrito. Segundo o informe do secretario da Deputación, ten dereito a percibir a asignación variable dos grupos políticos, que equivale a 1.500 euros por deputado, pero non a fixa, que supón 4.000 euros mensuais.
Pero, a pesar diso, considera que debe de ter máis medios para desenvolver o seu traballo en solitario, e non descarta que sexa en forma de máis diñeiro e de máis medios materiais. Así, preguntará pola posibilidade de dispor dalgún local da Deputación para exercer ese traballo e mesmo para reunirse "coa prensa".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.