Baixan as temperaturas en Galicia tras os 41,8º de Ribadavia

Este mércores 24 de xullo será "a xornada álxida" da onda de calor, que se espera comece a remitir este xoves, aínda que as temperaturas continuarán altas os próximos días en amplas zonas do territorio do estado, segundo informou o portavoz da Axencia Estatal de Meteoroloxía (AEMET), Jesús Riesco.

Deste xeito, onte martes o máis significativo foi que as temperaturas máximas superaron os 35 graos centígrados (ºC) en amplas áreas do interior peninsular, e na metade sur superáronse os 40ºC nas depresións fluviais, cun rexistro de 42,5ºC en Badaxoz e tamén de forma local noutros puntos.

O portavoz de AEMET destacou, entre outros valores extremos, os rexistrados ao paso do río Miño por Ourense, con 41,8ºC en Rivadavia, mentres que en Canarias as temperaturas máximas superaron os 30ºC nas vertentes sur das illas, cos valores máis altos en Gran Canaria, con 37,4ºC en Tejeda.

Para este mércores, a AEMET prevé que na maior parte do país continúe unha situación de estabilidade con altas temperaturas e predominio de ceos pouco nubrados ou despexados, salvo no norte de Galicia e a área a Cantábrica, con probabilidade de bancos de néboa matinais e baixa probabilidade de precipitacións débiles e dispersas, sendo máis probables na Mariña de Lugo. Tamén algún intervalo de nubes baixas matinais noutras zonas do extremo norte, Delta do Ebro e puntos de Alborán.

Para este xoves 25 de xullo, Día de Santiago, o AEMET informou de que continuará na maior parte do país unha situación de estabilidade con predominio de ceos pouco nubrados ou despexados, salvo no norte de Galicia e Área Cantábrica, onde haberá ceos nubrados sen descartar precipitacións débiles e dispersas. Espéranse intervalos de nubes baixas matinais noutras zonas do extremo norte, litoral este peninsular e a contorna de Alborán.