Tres persoas trasladadas no incendio dunha vivenda en Caldas de Reis

Tres persoas tiveron que ser trasladadas este venres tras producirse un incendio nunha vivenda no municipio pontevedrés de Caldas de Reis. Segundo detallou o 112 Galicia, a voz de alarma deuna un particular cinco minutos antes das 05.00 horas. Durante a súa chamada á central de emerxencias sinalaba que ardía unha habitación dun piso situado na rúa Fermín García.

Con estes datos, os operadores do Centro Integrado de Atención ás Emerxencias de Galicia (CIAE-112) deron aviso aos servizos sanitarios, aos bombeiros do Salnés, á Garda Civil de Pontevedra e ás Agrupacións de Voluntarios de Protección Civil de Caldas e de Cuntis.

Xa no lugar, os servizos de emerxencias confirmaron que o lume afectaba o ático do edificio. Do mesmo xeito, indicaban que se estaba procedendo ao desaloxo de todo o bloque. Despois de actuar para controlar e extinguir o incendio, os Bombeiros do Salnés explicaron que arderan por completo tres habitacións da vivenda. Tamén se derrubaron varias placas do teito e o resto do inmoble foi afectado polo fume.

Pola súa banda, os servizos sanitarios informaron de que tiveran que ser trasladadas tres persoas ata o Centro de Saúde, mentres que outro catro, entre elas tres bombeiros, foron atendidas no lugar.