Trinta e nove graos universitarios aínda teñen prazas libres a poucos días de comezar o curso
O alumnado que foi convocado a matricularse este martes terá de prazo desde este mércores 4 ás 00.01 ata este xoves, día 5, ás 23.59 para formalizar a matrícula
Por Europa Press / Redacción | SANTIAGO DE COMPOSTELA | 03/09/2024 | Actualizada ás 17:25
A Comisión Interuniversitaria de Galicia (CiUG) publicou este martes o sexto chamamento á matrícula, despois do quinto realizado xa a finais de xullo. De tal forma, o tres universidades públicas galegas chegaron a setembro, a poucos días de que arrinquen as clases, con 39 carreiras --unha de cada cinco-- nos que aínda hai prazas libres.
E é que, de acordo coa listaxe publicada este martes, tan só o Grao en Traballo Social pola Universidade de Santiago de Compostela (USC) completouse tras esta sexta convocatoria.
De feito, a finais de xullo, co quinto chamamento, eran só 34 as titulacións que tiñan prazas libres. Agora, creceron ata as 39. Pode deberse a diversos motivos, por exemplo a alumnos que, aínda que foron aceptados nunha carreira, non acabaron formalizando a súa matrícula.
Por universidades, na de Vigo aínda aceptan alumnos o Grao en Ciencia e Tecnoloxía dos Alimentos, Ciencias Ambientais, Enxeñaría Agraria e Turismo, no Campus de Ourense.
Na propia cidade olívica, aínda hai prazas en Enxeñaría Forestal, o PARS (Programa Académico de Percorrido Sucesivo) en Telecomunicación, Enxeñaría dos Recursos Mineiros e Enerxéticos, Linguas Estranxeiras, Traudcción e Interpretación Español-Francés e Galego-Inglés, e Filoloxía Aplicada en Galego e Español.
Na USC, aínda non colgaron o cartel de 'completo' Ciencia Política e da Administración, Filoloxía Clásica, Lingua e Literatura Galegas, Linguas e Literaturas Modernas, Relacións Laborais e Recursos Humanos, Xeografía e Ordenación do Territorio, todas elas en Santiago.
No Campus de Lugo, aínda non pecharon a admisión Administración e Dirección de Empresas, Enxeñaría Civil, Enxeñaría Forestal e do Medio Rural, Procesos Químicos Industriais, Relacións Laborais e Recursos Humanos, Paisaxe, Xestión Cultural tanto presencial como semipresencial, e o Grao Aberto 5USC Enxeñarías.
Finalmente, na Universidade da Coruña (UDC), aínda hai prazas en Enxeñaría Eléctrica, Relacións Laborais e Recursos Humanos, e Xestión Dixital de Información e Documentación, en Ferrol.
Na cidade herculina, non están completas Enxeñaría de Obras Públicas, Máquinas Navais, Español: Estudos Lingüísticos e Literarios, Galego-Portugués: Estudos Lingüísticos e Literarios, Inglés: Estudos Lingüísticos e Literarios, Socioloxía, Tecnoloxías da Enxeñaría Civil, Turismo presencial e 'en liña', e o dobre grao en Inglés e Galego Portugués.
PRAZOS
O alumnado que foi convocado a matricularse este martes terá de prazo desde este mércores 4 ás 00.01 ata este xoves, día 5, ás 23.59 para formalizar a matrícula. Unicamente poderán facelo aquelas persoas que posúan cualificación igual ou superior á da última persoa convocada en cada titulación.
Se a persoa solicitante aparece convocada nunha titulación que non sexa a de primeira preferencia poderá esperar a matricularse nela (en sucesivas convocatorias) en tanto non se peche a matrícula nas titulacións solicitadas con maior preferencia.
Para iso, deberá reconfirmar na plataforma 'Nerta' que desexa continuar na lista de espera, pero debe ter en conta que só quedan tres chamamentos máis e prazas libres en 39 titulacións.
