A USC desenvolve unha innovadora metodoloxía para a reconstrución en 3D de petróglifos

AsTrend é unha nova metodoloxía de posprocesado informático que se está aplicando en Galicia a petróglifos, inscricións e gravados megalíticos.

Por Galicia Confidencial | Santiago | 29/12/2015 | Actualizada ás 16:01

Comparte esta noticia

Investigadores da área de Prehistoria e Arqueoloxía da Universidade de Santiago de Compostela (USC) desenvolveron AsTrend, unha nova metodoloxía de posprocesado informático realizada sobre software libre e cunha cámara fotográfica para a reconstrución en 3D de petróglifos, inscricións ou gravados megalíticos. Na actualidade está sendo testada en petróglifos de Campo Lameiro así como en inscricións do Museo do Pobo Galego, informa a universidade compostelá.

Detalle do resultado obtido con AsTrend
Detalle do resultado obtido con AsTrend | Fonte: USC.

Miguel Carrero Pazos, Alia Vázquez Martínez e Benito Vilas Estévez son os responsables deste desenvolvemento que axudará a obter “un rexistro máis exacto dos gravados”. A proposta deste equipo atópase en vías de publicación e será presentado no Computer Applications and Quantitative Methods in Archeology, en 2016 en Oslo, o principal congreso internacional sobre novas tecnoloxías aplicadas á Arqueoloxía, no que os investigadores da USC agardan unha boa acollida.

Un proceso de baixo custe

O proceso, explican os investigadores, parte do traballo cun escáner 3D ou cunha metodoloxía de baixo custe denominada fotogrametría de obxecto cercano e “baséase na creación dun modelo tridimensional a partir de series de fotografías  que se poden tomar con cámaras convencionais”.

O que diferenza o proceso desenvolvido polos investigadores da USC de traballos previos similares “é unha mellora no posprocesado, resaltar as concavidades e convexidades do modelo 3D para ler mellor os seus gravados”. Como explica Miguel Carrero, “ata agora existían achegas que, de diferente forma, xogaban con sombras artificiais para poder ver mellor os motivos”, se ben a nova proposta “utiliza as visualizacións típicas da tecnoloxía LiDAR para exaltar detalles”. O resultado é “un rexistro dos gravados moito máis exacto”, aínda que advirten “non debe ser visto como unha superación do calco tradicional, senón como un complemento”.

De esquerda a dereita, Antón Rodríguez, Miguel Carrero, Alia Vázquez, Benito Vilas e Ramón Fábregas Valcarce, investigadores de Prehistoria e Arqueoloxía
De esquerda a dereita, Antón Rodríguez, Miguel Carrero, Alia Vázquez, Benito Vilas e Ramón Fábregas Valcarce, investigadores de Prehistoria e Arqueoloxía | Fonte: USC.

Antecedentes

AsTrend forma parte do proxecto de investigación ‘Documentación fotográfica dos motivos de cérvidos de Campo Lameiro: prospección arqueolóxica superficial’ que dirixe o profesor de Prehistoria e Arqueoloxía Antón A. Rodríguez Casal, coa colaboración do catedrático da mesma área Ramón Fábregas Valcarce. Esta liña continua os traballos iniciados nos anos 90 polos profesores Antón A. Rodríguez Casal e Lorenzo Gómez González, este último da Facultade de Física, sobre técnicas de reconstrución fotogramétrica aplicadas ao estudo de petróglifos.

O actual equipo de investigadores está comparando os resultados da metodoloxía cos métodos tradicionais de rexistro, principalmente en petróglifos, liña de investigación con gran tradición no equipo do profesor Fábregas.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta